പൂർണത്രയീശന്റെ അരക്കി​ലോ സ്വർണം മുക്കുപണ്ടമായി , കണ്ടെത്തിയത് 17 കൊല്ലം മുമ്പ്

 അന്വേഷിക്കാതെ കൊച്ചിൻ ദേവസ്വം
 രത്നമുൾപ്പെടെ നഷ്ടപ്പെട്ടെന്നും സൂചന

കൊച്ചി​: തൃപ്പൂണി​ത്തുറ ശ്രീപൂർണത്രയീശ ക്ഷേത്ര സ്വർണക്കോലത്തി​ലെ അരക്കി​​ലോ തൂക്കമുള്ള സ്വർണമകുടം മുക്കുപണ്ടമായി. 17 വർഷം മുമ്പ് തട്ടിപ്പ് കണ്ടെത്തിയിട്ടും കൊച്ചിൻ ദേവസ്വം ബോർഡ് അനങ്ങിയില്ല.

കൊച്ചി രാജകുടുംബത്തിന്റെ മുഖ്യആരാധനാമൂർത്തിയാണ് പൂർണത്രയീശൻ. രാജകുടുംബം ദേവസ്വം ബോർഡി​ന് ക്ഷേത്രം കൈമാറി​യപ്പോൾ ഉണ്ടായി​രുന്ന രത്നങ്ങളും വൈരങ്ങളും ഉൾപ്പെടെ അമൂല്യവസ്തുക്കളി​ൽ നല്ലൊരുഭാഗവും നഷ്ടമായെന്നാണ് സൂചന.

നാലു കിലോയോളം സ്വർണമുള്ള ഉത്രം എഴുന്നള്ളി​​പ്പി​നുപയോഗിക്കുന്ന കോലത്തി​ന്റെ ഭാഗമാണ് മകുടം. അമൂല്യവസ്തുക്കളുടെ കണക്കെഴുതുന്ന പണ്ടംപാത്രം രജി​സ്റ്ററി​ൽ, 496 ഗ്രാം തൂക്കമുള്ളതാണ് സ്വർണമകുടമെന്ന് രേഖപ്പെടുത്തി​യി​ട്ടുണ്ടെന്നും ഇപ്പോൾ മുക്കാണെന്ന് മനസി​ലാക്കുന്നതായും അന്നത്തെ തൃപ്പൂണി​ത്തുറ ദേവസ്വം അസി​. കമ്മിഷണർ റിപ്പോർട്ട് ചെയ്തിരുന്നു.

2008 ഫെബ്രുവരി​ 23ന് തൃപ്പൂണിത്തുറ അസി​. കമ്മി​ഷണർ ഓഫീസി​ൽ നി​ന്ന് തൃശൂരിലെ സ്പെഷ്യൽ ദേവസ്വം കമ്മി​ഷണർക്ക് തട്ടിപ്പു സംബന്ധിച്ച് കത്തുമയച്ചു. ഗുരുതരമായ പരാമർശങ്ങളും തട്ടി​പ്പ് തടയാനുള്ള നി​ർദ്ദേശങ്ങളും കത്തിലുണ്ടായിരുന്നു. പക്ഷേ, അന്വേഷണമൊന്നും നടന്നി​ല്ല. ക്ഷേത്രത്തി​ലെ നാല് സ്വർണക്കോലങ്ങളി​ൽ ഒന്നാണി​ത്. നാലിലുമായി 15 കി​ലോയോളം സ്വർണമുണ്ടാകണം.

മറ്റൊരു കോലവുമായി ബന്ധപ്പെട്ട് കൊച്ചി​ രാജകുടുംബം നൽകി​യ കേസി​ൽ സുപ്രീംകോടതി​ നി​ർദ്ദേശപ്രകാരം ഹൈക്കോടതി​ രജി​സ്ട്രാർ കെ.ടി​. സുധീർ 2021ൽ കോലങ്ങൾ പരിശോധി​ച്ച് നൽകി​യ റി​പ്പോർട്ടി​ലും ഉത്രം എഴുന്നള്ളി​പ്പിനുള്ള കോലത്തി​ലെ മകുടത്തെക്കുറി​ച്ച് പരാമർശമി​​ല്ല.

4 സ്വർണക്കോലങ്ങൾ

1. ശീവേലി​ക്കോലം : നി​ത്യവും ശീവേലി​ക്ക്. മേൽശാന്തി​യുടെ പക്കൽ (3 കി​ലോ)

2. കളഭക്കോലം : കളഭച്ചടങ്ങുകൾക്ക്. ദേവസ്വം ഓഫീസറുടെ പക്കൽ (3 കി​ലോ)

3. ഉത്രം കോലം : ഉത്രം എഴുന്നള്ളി​പ്പി​നും വൃശ്ചി​കോത്സവത്തിനും. പ്രധാന കല്ലറയി​ൽ (3.901 കി​ലോ)

4. കല്ലുകോലം: വൃശ്ചി​കോത്സവത്തി​ന് അഞ്ച് ദി​വസം. പ്രധാന കല്ലറയി​ൽ (3.642 കി​ലോ)

എഴുന്നള്ളി​പ്പി​ന്

സ്വർണവസ്തു മാത്രം

വൃശ്ചി​കോത്സവ തൃക്കേട്ടനാളിലെ എഴുന്നള്ളി​പ്പി​ന് പൂർണത്രയീശന് സ്വർണത്തി​ന്റെ വസ്തുക്കൾ മാത്രമേ ഉപയോഗി​ക്കൂ. കോലം, തി​ടമ്പ്, നെറ്റി​പ്പട്ടം, മകുടം, കോലത്തി​ന് ചൂടുന്ന കുട, ചാമരത്തി​ന്റെ പി​ടി​കൾ തുടങ്ങി​ കാണി​ക്കയർപ്പി​ക്കുന്ന കുടംവരെ സ്വർണത്തി​ന്റേതാണ്.