നിർണായക തീരുമാനങ്ങൾ പ്രതീക്ഷിച്ച് വിപണികൾ

ഓഹരി, സ്വർണ വിപണികൾ സംഭവബഹുലമാകും

കൊച്ചി: അമേരിക്കൻ ഫെഡറൽ റിസർവിന്റെ പലിശ തീരുമാനവും ഡൊണാൾഡ് ട്രംപും ഷീ ജിൻപിംഗുമായുള്ള കൂടികാഴ്ചയും കമ്പനികളുടെ പ്രവർത്തന ഫലങ്ങളും ഈ വാരം ഇന്ത്യൻ ഓഹരി വിപണിയുടെ ചലനങ്ങളെ സ്വാധീനിക്കും. ഇന്ത്യയുടെ വ്യവസായ ഉത്പാദന സൂചികയിലെ വളർച്ച നിരക്ക് നാളെ പുറത്തുവരും. ചൈനീസ് ഉത്പന്നങ്ങൾക്ക് അമേരിക്ക ചുമത്തിയ നൂറ് ശതമാനം തീരുവ ഒഴിവാക്കാൻ പുതിയ വ്യാപാര ചട്ടക്കൂടിന് ധാരണയായെന്ന് യു.എസ് ട്രഷറി സെക്രട്ടറി സ്കോട്ട് ബെസന്റ് ഇന്നലെ വ്യക്തമാക്കിയത് വിപണിക്ക് ഏറെ ആശ്വാസമാണ്. അമേരിക്ക, ചൈന പ്രസിഡന്റുമാരുടെ കൂടിക്കാഴ്ചയ്ക്ക് മുൻപ് ഇക്കാര്യം പ്രഖ്യാപിച്ചേക്കും.

വിദേശ നിക്ഷേപ സ്ഥാപനങ്ങൾ ശക്തമായി തിരിച്ചെത്തിയതോടെ ദീപാവലിക്ക് ശേഷം മുഖ്യ ഓഹരി സൂചികകൾ മികച്ച മുന്നേറ്റം നടത്തിയിരുന്നു. എന്നാൽ വാരാന്ത്യത്തിൽ ഓഹരികൾ വിൽപ്പന സമ്മർദ്ദം നേരിട്ടു. ആഭ്യന്തര ധന സ്ഥാപനങ്ങളും ആവേശത്തോടെയാണ് വിപണിയിൽ പണമൊഴുക്കുന്നത്.

കമ്പനികളുടെ പ്രകടനത്തിൽ കണ്ണുനട്ട്

നടപ്പു സാമ്പത്തിക വർഷത്തിലെ രണ്ടാം ത്രൈമാസക്കാലയളവിലെ കമ്പനികളുടെ പ്രവർത്തന ഫലമാണ് നിക്ഷേപകർ കരുതലോടെ കാത്തിരിക്കുന്നത്. ഐ.ഒ.സി, എൽ ആൻഡ് ടി, എച്ച്.പി.സി.എൽ, ഐ.ടി.സി, മാരുതി സുസുക്കി, എ.സി.സി തുടങ്ങിയ കമ്പനികൾ ഈ വാരം പ്രവർത്തന ഫലം പുറത്തുവിടും. ഉത്സവ കാലയളവിലെ ഉപഭോഗ ഉണർവിന്റെയും പലിശ നിരക്കിലെ ഇളവിന്റെയും കരുത്തിൽ കമ്പനികളുടെ ലാഭവും വിറ്റുവരവും ഇത്തവണ മെച്ചപ്പടുമെന്ന പ്രതീക്ഷയിലാണ് നിക്ഷേപകർ.

കേന്ദ്ര ബാങ്കുകളുടെ പലിശ തീരുമാനം

അമേരിക്കൻ ഫെഡറൽ റിസർവ്, യൂറോപ്യൻ സെൻട്രൽ ബാങ്ക്, ബാങ്ക് ഒഫ് ജപ്പാൻ എന്നിവയുടെ പലിശ തീരുമാനം ഈ വാരമുണ്ടാകും. സാമ്പത്തിക മേഖലയിലെ തളർച്ച മറികടക്കാൻ ഫെഡറൽ റിസർവ് മുഖ്യ പലിശ കാൽ ശതമാനം കുറയ്ക്കുമെന്നാണ് പ്രതീക്ഷിക്കുന്നത്. മറ്റുള്ളവർ കരുതലോടെ മാത്രമേ തീരുമാനം എടുക്കൂ.

ഇന്ത്യ-അമേരിക്ക വ്യാപാര കരാറിന് സാദ്ധ്യത

കാർഷിക ഉത്പന്നങ്ങളുടെ തീരുവയിൽ വിട്ടുവീഴ്ച നടത്തി ഇന്ത്യയും അമേരിക്കയുമായി അടുത്ത ദിവസം വ്യാപാര കരാർ ഒപ്പുവച്ചേക്കും. ഇന്ത്യൻ ഉത്പന്നങ്ങൾക്ക് അമേരിക്ക ഏർപ്പെടുത്തിയ 50 ശതമാനം തീരുവ കയറ്റുമതി വളർച്ചയെ ബാധിക്കുന്നതിനാൽ പരമാവധി വേഗത്തിൽ കരാർ യാഥാർത്ഥ്യമാക്കുന്നതിനാണ് ശ്രമം.

സ്വർണ വില ഇനിയും താഴ്ന്നേക്കും

ആഗോള ധന മേഖലയിലെ പ്രതിസന്ധികൾ ഒഴിയുന്നതിനാൽ വരും ദിവസങ്ങളിൽ സ്വർണ വില താഴ്ന്നേക്കും. ട്രംപ്-ഷീ കൂടികാഴ്ചയിൽ വ്യാപാര തർക്കങ്ങളിൽ മഞ്ഞുരുകിയാൽ സ്വർണത്തിൽ കനത്ത വിൽപ്പന സമ്മർദ്ദമുണ്ടായേക്കും. കേന്ദ്ര ബാങ്കുകളും സ്വർണം വാങ്ങൽ കുറയ്ക്കാൻ ഇടയുണ്ട്. നടപ്പുവാരം രാജ്യാന്തര വില 3,800 ഡോളറിനും 4,200 ഡോളറിനും ഇടയിൽ തുടരുമെന്നാണ് പ്രതീക്ഷയെന്ന് ഗോൾഡ് ആൻഡ് സിൽവർ മർച്ചന്റ്‌സ് അസോസിയേഷൻ ജനറൽ സെക്രട്ടറി എസ്. അബ്ദുൽ നാസർ പറഞ്ഞു.