ഫ്രീയായി ചായ കിട്ടും,​ ഇവിടെ താമസിക്കാൻ വെറും 20 രൂപ കൊടുത്താൽ മതി; ചെലവ് കുറയ്ക്കാം പക്ഷെ ട്വിസ്റ്റുണ്ട്

ചെലവ് കുറച്ച് കൂടുതൽ സ്ഥലങ്ങൾ കണ്ടുമടങ്ങാനാണ് സഞ്ചാരികൾ പദ്ധതിയിടുന്നത്. അതിനായി ആഡംബര വാസസ്ഥലങ്ങളും ഭക്ഷണവും ഒഴിവാക്കാൻ ചിലരെങ്കിലും ശ്രദ്ധിക്കാറുണ്ട്. ഒ​റ്റയ്ക്ക് യാത്ര നടത്തുന്നവരിലേറെയും ഇത്തരത്തിൽ ചെയ്യുന്നവരായിരിക്കും. അടുത്തിടെ ഒരു വിദേശ സഞ്ചാരി വെറും 20 രൂപ കൊടുത്ത് താമസിക്കാൻ കഴിയുന്ന ഒരു ഹോട്ടൽ ഇൻസ്​റ്റഗ്രാം വീഡിയോയിലൂടെ പരിചയപ്പെടുത്തി.

വീഡിയോ വൈറലായതോടെ ഹോട്ടൽ മുറികൾ എവിടെയാണെന്ന് അന്വേഷിച്ചറിയാൻ നിരവധിയാളുകൾ എത്തി. ഒടുവിലാണ് സത്യാവസ്ഥ മനസിലായത്. ബഡ്ജ​റ്റ് സൗഹൃദപരമായി ഹോട്ടൽ മുറിയിൽ താമസിക്കാമെന്നായിരുന്നു വീഡിയോ. പാകിസ്ഥാനിലെ പെഷവാർ നഗരത്തിലെ ഒരു ഹോട്ടലാണ് വീഡിയോയിലുളളത്. ബ്രിട്ടീഷ് ട്രാവൽ വ്‌ളോഗറായ ഡേവിഡ് സിംപ്സണാണ് വീഡിയോ പങ്കുവച്ചത്.

താൻ സാധാരണയായി ഫൈവ് സ്​റ്റാർ ഹോട്ടലിലാണ് താമസിക്കുന്നതെന്നും എന്നാൽ ചെറിയ ഹോട്ടൽ മുറിയിൽ നിന്നുലഭിച്ച അനുഭവങ്ങൾ മറക്കാൻ സാധിക്കില്ലെന്നുമാണ് യുവാവ് പറഞ്ഞത്. 'കാരവെൻസറായി എന്നാണ് ഈ സിമ്പിൾ ഹോട്ടലിന്റെ പേര്. പക്ഷെ ഈ ഹോട്ടലിൽ പ്രത്യേക മുറികളില്ല, എയർ കണ്ടീഷണറില്ല, അലങ്കാരങ്ങളില്ല, ഒരു കെട്ടിടത്തിന്റെ റൂഫ് ടോപ്പിൽ താമസിക്കാനുളള സൗകര്യമാണ് ഒരുക്കിയിരിക്കുന്നത്, ഇവിടെയെത്തുന്ന അതിഥികൾ പരമ്പരാഗത കട്ടിലുകളിലാണ് കിടക്കുന്നത്. വൃത്തിയുളള ഷീ​റ്റുകൾ ലഭ്യമാണ്, ഫാനുണ്ട്, സൗജന്യമായി ചായയും ഇവിടെ ലഭ്യമാണ്. ഹോട്ടലിന്റെ ഉടമ വലിയ സ്നേഹത്തോടെയും അതിവിനയത്തോടുമാണ് സഞ്ചാരികളോട് പെരുമാറുന്നത്. നഗരത്തിലെ പല വലിയ കെട്ടിടങ്ങളും ഇവിടെ നിന്ന് ആസ്വദിക്കാവുന്നതാണ്. ഫൈവ് സ്റ്റാർ ഹോട്ടലുകളിൽ താമസിക്കുമ്പോൾ ലഭിക്കുന്നതിനേക്കാൾ സംതൃപ്തി ഇവിടെ നിന്ന് ലഭിക്കും'- യുവാവ് വീഡിയോയിൽ പറഞ്ഞു.

വീഡിയോയ്ക്ക് പലതരത്തിലുളള പ്രതികരണങ്ങളാണ് ലഭിക്കുന്നത്. ചിലർ യുവാവിനെ കളിയാക്കുന്നുണ്ട്,​ ഇത്തരത്തിലൊരു മുറിയിൽ താമസിക്കാൻ വട്ടാണോയെന്നാണ് ഒരാൾ പ്രതികരിച്ചത്. മറ്റൊരാൾ കമന്റ് ചെയ്തത്,​ ഒറ്റയ്ക്ക് യാത്ര ചെയ്യുന്നവർക്ക് ഈ മുറി മതിയാകുമെന്നാണ്.