വൺഡേ ടെസ്റ്റ്

റാഞ്ചി: ടെസ്‌റ്റ് പരമ്പരയ്ക്ക് പിന്നാലെ ഏകദിനത്തിൽ ഏറ്റുമുട്ടാൻ ഇന്ത്യയും ദക്ഷിണാഫ്രിക്കയും ഇന്നിറങ്ങും. മൂന്ന് മത്സരങ്ങൾ ഉൾപ്പെട്ട ഏകദിന പരമ്പരയിലെ ആദ്യ മത്സരം ഇന്ന് റാഞ്ചിയിലെ ജാർഖണ്ഡ് ക്രിക്കറ്റ് അസോസിയേഷൻ ഗ്രൗണ്ടിൽ നടക്കും. മത്സരം ഉച്ചയ്ക്ക് 1.30ന് ആരംഭിക്കും.

രണ്ട് മത്സരങ്ങൾ ഉൾപ്പെട്ട ടെസ്റ്റ് പരമ്പരയിലെ സമ്പൂർണ തോൽവിക്ക് പകരം വീട്ടാനുറച്ചാണ് ഇന്ത്യ ഇറങ്ങുന്നത്. മറുവശത്ത് ടെസ്റ്റിലെ ആധിപത്യം ഏകദിനത്തിലും തുടരാമെന്നാണ് ദക്ഷിണാഫ്രിക്കയുടെ കണക്കുകൂട്ടൽ.

സ്ഥിരം നായകൻ ശുഭ്‌മാൻ ഗില്ലിനും വൈസ് ക്യാപ്ടൻ ശ്രേയസ് അയ്യർക്കും പരിക്കായതിനാൽ കെ.എൽ രാഹുലിന്റെ നേതൃത്വത്തിലാണ് ഇന്ത്യ ഏകദിന പരമ്പരയിൽ ഇറങ്ങുന്നത്. സമീപകാലത്ത് ഏകദിനത്തിൽ മികച്ച പ്രകടനം നടത്തുന്ന ഇന്ത്യൻ ടീം റാങ്കിംഗിലും ഒന്നാമതാണ്.

സൂപ്പർ താരങ്ങളും മുൻ നായകൻമാരുമായ രോഹിത് ശർമ്മയുടേയും വിരാട് കൊഹ്‌ലിയുടേയും ടീമിന് നൽകുന്ന ആത്മവിശ്വാസം വളരെവലുതാണ്. ഇരുവരും ഫോമിലാണെന്നതും ഇന്ത്യയ്ക്ക് പ്ലസ് പോയിന്റാണ്.

ടെംബ ബവുമയുടെ നേതൃത്വത്തിൽ തന്നെയാണ് ഏകദനിത്തിലും ദക്ഷിണാഫ്രിക്ക ഇറങ്ങുന്നത്. പരിക്കിന്റെ പിടിയിലായ കഗീസോ റബാഡ ഏകദിനത്തിലും കളിക്കില്ല.

ടീം ന്യൂസ്

ഇന്ത്യ-ഗില്ലിന് പകരം യശ്വസി ജയ്‌സ്വാൾ ആയിരിക്കും രോഹിതിനൊപ്പം ഓപ്പണറായി ഇറങ്ങുകയെന്നാണ് വിവരം. അയ്യർക്ക് പകരക്കാരനായി റുതുരാജും ആദ്യ ഇലവനിൽ ഇടം നേടാനാണ് കൂടുതൽ സാധ്യത. റിഷഭ് പന്തും ഈ സ്ഥാനത്തേക്ക് പരിഗണനയിലുണ്ട്. ബുംറയ്ക്ക് വിശ്രമം അനുവദിച്ചതിനാൽ അർഷ്ദീപ് സിം‌ഗ് തന്നെയാകും പേസ് ഡിപ്പാർട്ട്മെന്റിനെ നയിക്കുക. സ്പിൻ ഓൾറൗണ്ടർമാരായി ജഡേജയും സുന്ദറും ഉണ്ടാകും. മീഡിയം പേസ് ഓൾറൗണ്ടറായ നിതീഷ് കുമാർ റെഡ്ഡിക്കും അവസരം ലഭിച്ചേക്കും.

സാധ്യതാ ടീം: രോഹിത്, ജയ്‌സ്വാൾ,കൊഹ്‌ലി,റുതുരാജ്/പന്ത്, രാഹുൽ,ജഡേജ,സുന്ദർ,നിതീഷ്,ഹർഷിത്,അർഷ്‌ദീപ്,പ്രസിദ്ധ് കൃഷ്‌ണ.

ദക്ഷിണാഫ്രിക്ക- ക്വിന്റൺ ഡി കോക്കിനൊപ്പം എയ്‌ഡൻ മർക്രം തന്നെയാകും ഓപ്പണിംഗ് പൊസിഷനിൽ ഇറങ്ങുക. ബവുമ മൂന്നാം നമ്പറിലും ഇറങ്ങിയേക്കും, മാർക്കോ ജാൻസണൊപ്പം ലുങ്കി എൻഗിഡിയും നാന്ദ്രേ ഡി ബർഗറും പേസ് ഡിപ്പാർട്ട്മെന്റിലുണ്ടാകും.ടെസ്റ്റിൽ റബാഡയ്ക്ക് പകരം ടീമിലെത്തിയ ഓൾറൗണ്ടർ കോർബിൻ ബോഷിന് ഇന്നും അവസരം ലഭിച്ചേക്കും.
സാധ്യതാ ടീം:- മർക്രം, ഡികോക്ക്,ബവുമ, ബ്രീറ്റ്‌സ്‌കെ,ബ്രെവിസ്,ഹെർമൻ,ജാൻസൺ,ബോഷ്,മഹാരാജ്,ബർഗർ,എൻഗിഡി.

പിച്ചും കാലാവസ്ഥയും

ഗേവത കുറഞ്ഞ പിച്ചാണ് റാഞ്ചിയിലേത്.ഇവിടെ നടന്ന അവസാന ഏകദിനത്തിൽ സ്പിന്നർ വാഷിംഗ്‌ടൺ സുന്ദറാണ് ഇന്ത്യയ്‌ക്കായി ബൗളിംഗ് ഓപ്പൺ ചെയ്‌തത്.

7- റാഞ്ചിയിലെ ജാർഖണ്ഡ് ക്രിക്കറ്റ് അസോസിയേഷൻ ഗ്രൗണ്ട് വേദിയാകുന്ന ഏഴാമത്തെ അന്താരാഷ്‌ട്ര ഏകദിന മത്സരമാണിത്. ഒരു തവണമാത്രമാണ് ഇവിടെ ഒരു ടീമിന് 300ൽ കൂടുതൽ ടോട്ടൽ നേടാനായത്. രാത്രി മഞ്ഞ് വീഴ്‌ച പ്രധാന ഘചകമായിരിക്കും.

റാഞ്ചിയിൽ ഇന്ന് മഴയ്ക്ക് സാധ്യതയില്ലെന്നാണ് കാലാവസ്ഥാ റിപ്പോർട്ട്. എന്നാൽ മഞ്ഞ് വീഴ്‌ചയുണ്ടാകും.

നോട്ട് ദി പോയിന്റ്

2006 മുതൽ ഇന്ത്യയും ദക്ഷിണാഫ്രിക്കയും തമ്മിൽ 10 ദ്വിരാഷ്ട്ര ഏകദിന പരമ്പരകൾ കളിച്ചിട്ടുണ്ട്. ഇരുടീമും 5 പരമ്പര വീതം സ്വന്തമാക്കി.

അവസാനം മുഖാമുഖം വന്ന 5 ഏകദിനങ്ങളിൽ നാലിലും ഇന്ത്യയ്ക്കായിരുന്നു ജയം.

ഏകദിനത്തിൽ നിലവിൽ ഇന്ത്യയാണ് ഒന്നാം റാങ്കിൽ. ഏകദിന ഫോർമാറ്റിൽ കഴിഞ്ഞയിടെ നടന്ന ഐ.സി.സി ചാമ്പ്യൻസ് ട്രോഫിയിലും ഏഷ്യാകപ്പിലും ഇന്ത്യയ്ക്കായിരുന്നു കിരീടം. 2023ലെ ഏകദിന ലോകകപ്പിൽ റണ്ണറപ്പുമായി.

റാഞ്ചിയിൽ അവസാനം നടന്ന ഏകദിന മത്സരത്തിലും ഇന്ത്യയും ദക്ഷിണാഫ്രിക്കയുമാണ് ഏറ്റുമുട്ടിയത്. 2022 ഒക്‌ടോബർ 9ന് നടന്ന ആ മത്സരത്തിൽ ഇന്ത്യ 7 വിക്കറ്റിന് ജയിച്ചു.