അഞ്ചൽ കൺവെൻഷൻ സമാപന സമ്മേളനം

അഞ്ചൽ: ദൈവഹിതം അന്വേഷിച്ച് ജീവിതത്തിൽ മുന്നേറുവാൻ മേജർ ആർച്ചുബിഷപ്പ് കർദിനാൾ മാർ ബസേലിയോസ് ക്ലീമീസ് കാതോലിക്കാബാവ വിശ്വാസികളെ ആഹ്വാനം ചെയ്തു. 25-ാമത് അഞ്ചൽ കൺവെൻഷന്റെ സമാപന സന്ദേശം നൽകുകയായിരുന്നു കാതോലിക്കാബാവ. ജീവിതത്തിൽ നിരാശയും പ്രതിസന്ധികളും വരുമ്പോൾ ദൈവത്തെ മുറുകെ പിടിക്കുവാൻ നാം തയ്യാറാകണം എന്നും അദ്ദേഹം ഓർമ്മിപ്പിച്ചു.

ആറ് ദിവസം നീണ്ടുനിന്ന കൺവെൻഷൻ സമൂഹബലിയോടെയാണ് സമാപിച്ചത്. അഞ്ചൽ സെന്റ് ജോൺസ് സ്കൂൾ ഗ്രൗണ്ടിൽ പ്രത്യേകം തയ്യാറാക്കിയ ബലി വേദിയിൽ കാതോലിക്കാബാവായുടെ മുഖ്യകാർമ്മികത്വത്തിൽ സമൂഹബലി നടന്നു. നൂറുകണക്കിന് വിശ്വാസികളാണ് സമാപന യോഗത്തിൽ പങ്കെടുത്തത്.

കൺവെൻഷൻ സമാപനത്തോടനുബന്ധിച്ച് അഞ്ചൽ വൈദികജില്ലയിൽ നിന്ന് പ്രത്യേക പരിശീലനം നേടിയ 28 സുവിശേഷ സംഘാംഗങ്ങൾക്ക് കാതോലിക്കാ ബാവ കൈവയ്പ് നൽകി. കൂടാതെ, തിരുവനന്തപുരം മേജർ അതിഭദ്രാസനത്തിൽ പുതിയതായി നിയമിതനായ സഹായമെത്രാൻ യൂഹാനോൻ മാർ അലക്സിയോസ് എപ്പിസ്കോപ്പായ്ക്ക് വൈദിക ജില്ലയുടെ ആഭിമുഖ്യത്തിൽ സ്വീകരണം നൽകി. കൂരിയാ മെത്രാൻ ബിഷപ്പ് ആന്റണി മാർ സിൽവാനോസും പരിപാടികളിൽ പങ്കെടുത്തു. സമാപന സമ്മേളനത്തിൽ വൈദിക ജില്ലാ വികാരി ഫാ. ബോവസ് മാത്യു, ഫാ.ജോൺ കാരവിള കോർ എപ്പിസ്കോപ്പ, ഫാ.അലക്സ് കളപ്പില, ഫാ.മാത്യു ചരിവുകാലായിൽ, ഫാ.വിൽസൺ ചരുവിള, ഫാ.ജോഷ്വാ കൊച്ചുവിളയിൽ, ഫാ.റെഞ്ചി മണിപ്പറമ്പിൽ, ഫാ.ജോസഫ് തോട്ടത്തിൽകടയിൽ, ഫാ.ക്രിസ്റ്റി ചരുവിള, ഫാ.ജോസഫ് വടക്കേടത്ത്, ജനറൽ കൺവീനർ ഡോ.കെ.വി.തോമസ് കുട്ടി, ജോ.കൺവീനർ രാജൻ ഏഴംകുളം എന്നിവർ പങ്കെടുത്തു.