എസ്.എൻ കോളേജിനു മുന്നിൽ കാൽനട യാത്രികർക്ക് കെണിയായി ഓടകൾ

കൊല്ലം: എസ്.എൻ കോളേജിന് സമീപത്തെ ഓടയുടെ മേൽമൂടികൾ പൊട്ടിപ്പൊളിഞ്ഞ് കിടക്കുന്നത് കാൽനട യാത്രികരെ വലയ്ക്കുന്നു. കണ്ണൊന്ന് തെറ്റിയാൽ മേൽമൂടി തകർന്ന് ഓടയിൽ വീണ് അപകടമുണ്ടാവാം എന്നതാണ് അവസ്ഥ.

ഈ സ്ളാബുകളെല്ലാം വളരെ പഴക്കം ചെവയാണ്. ചില സ്ലാബുകളുടെ ഒരുവശം ഉയർന്ന് നിൽക്കുന്നു. സ്ലാബുകൾക്കിടയിൽ വിടവുള്ളതും അപകടസാദ്ധ്യത വർദ്ധിപ്പിക്കുന്നു. നിരതെറ്റി പൊങ്ങി നിൽക്കുന്ന സ്ലാബുകളിൽ തട്ടി നേരി പരിക്കേൽക്കുന്നവർ ഏറെയാണ്. പ്രായമായവർ നിലതെറ്റി വീഴാനുള്ള സാദ്ധ്യതയും കൂടുതലാണ്. രാത്രികാലങ്ങളിലാണ് ആശങ്ക വർദ്ധിക്കുന്നത്.

കോളേജ് വി‌ദ്യാർത്ഥികൾ ഉൾപ്പടെ നിരവധി ആളുകൾ ഉപയോഗിക്കുന്ന നടപ്പാത അപകടക്കെണിയായിട്ടും അധികൃതർ തിരി‌ഞ്ഞു നോക്കാത്ത സ്ഥിതിയാണ്. ദേശീയപാതയുടെ ഉടമസ്ഥതയിലുള്ള ഈ ഓടയ്ക്ക് വർഷങ്ങളുടെ പഴക്കമുണ്ട്. നിരവധി പരാതികൾ ഉയർന്നതിനെ തുടർന്ന് അധികൃതർ ഇടപെട്ട്, പൊട്ടിയ പല സ്ലാബുകളും മറ്റി സ്ഥാപിച്ചിരുന്നു. എന്നാൽ പുതിയ സ്ലാബിന് പകരം പഴയവയാണ് ഇട്ടതെന്ന ആക്ഷേപവുമുണ്ട്. വീണ്ടും സ്ലാബുകൾ പൊട്ടാൻ കാരണവും ഇതാണെന്ന് നാട്ടുകാർ ആരോപിക്കുന്നു.

മലിനജലം പുറത്തേക്ക്

ഓടകളിൽ മാലിന്യം അടിഞ്ഞുകൂടി കിടക്കുന്നതിനാൽ സ്ലാബിന്റെ വിടവിലൂടെ മലിനജലം പുറത്തേക്ക് ഒഴുകുന്നതും പതിവാണ്. കോളേജിന്റെ പ്രധാന ഗേറ്റിന് സമീപത്തുൾപ്പെടെ ദുർഗന്ധം വമിക്കുന്ന അഴുക്കു വെള്ളം കെട്ടിക്കിടക്കുന്നു. മൂക്ക്പൊത്തിയല്ലാതെ നടക്കാൻ കഴിയില്ലെന്ന അവസ്ഥയാണ്. ചെറിയ മഴ പെയ്താൽ പോലും മാലിന്യം നടപ്പാതകളിൽ നിറയും. ഓടയുടെ പഴക്കം ചെന്ന മൂടികൾ മാറ്റി പുതിയ സ്ലാബുകൾ സ്ഥാപിക്കണമെന്നും മലിനജലം കെട്ടിക്കിടക്കുന്നത് ഒഴിവാക്കാൻ അടിയന്തര നടപടി സ്വീകരിക്കണമെന്നുമാണ് പൊതുവെയുള്ള ആവശ്യം.