കനകം മൂലം കാമിനി മൂലം; ചെറ്യേട്ടന്റെ വിലാപവും

കാറ്റുള്ളപ്പോൾ തൂറ്റണം! ശബരിമലയിലെ സ്വർണക്കൊള്ളയിൽ സ്പോൺസർ ഉണ്ണിക്കൃഷ്ണൻ പോറ്റിയും അഡ്മിനിസ്ട്രേറ്റീവ് ഓഫീസർ മുരാരി ബാബുവും മുതൽ സി.പി.എമ്മിന് വേണ്ടപ്പെട്ട മുൻ ദേവസ്വം ബോർഡ് പ്രസിഡന്റുമാരായ എൻ. വാസുവും എ. പത്മകുമാറും വരെ അഴിക്കുള്ളിലായി. ഭരണതലത്തിലെ ഉന്നതങ്ങളിൽ അടുത്ത പിടി വിഴുന്നത് ആർക്കു മേലെന്ന ആശങ്ക ഒരു വശത്ത്. ചൂടുപിടിച്ച തദ്ദേശ തിരഞ്ഞെടുപ്പ് പ്രചാരണം മറുവശത്ത്. വിധിയെഴുത്തിന് കഷ്ടിച്ച് ഒന്നരയാഴ്ച. പ്രചാരണ വിഷയമായി ശബരിമല സ്വർണക്കൊള്ള മാത്രം തുടരുന്നത് ഭരണമുന്നണിയെ വല്ലാതെ പൊള്ളിക്കും; പ്രതിപക്ഷത്തിന് ലോട്ടറിയാവും.

പ്രതിപക്ഷത്തെ വീഴ്ത്താൻ അതാ വരുന്നു,​ വജ്രായുധം! ലൈംഗിക പീഡനം, ഗർഭഛിദ്രത്തിന് പ്രേരിപ്പിക്കൽ, വധ ഭീഷണി. ജാമ്യമില്ലാത്ത വകുപ്പുകൾക്ക് കേസ്. കഥാനായകൻ പാലക്കാട് എം.എൽ.എയും യൂത്ത് കോൺഗ്രസ് നേതാവുമായ രാഹുൽ മാങ്കൂട്ടത്തിൽ. പ്രതിയെ കുടുക്കാൻ 'ഇരകളായ" യുവതികളുടെ ചാനൽ വെളിപ്പെടുത്തലുകൾ മുതൽ ശബ്ദസന്ദേശങ്ങൾ വരെ. സർക്കാർ ഉണർന്നു. കേസന്വേഷണം ക്രൈംബ്രാഞ്ചിന്. പക്ഷേ, പൊലീസിൽ പരാതി നൽകാൻ ഒരു 'ഇരയ്ക്കും" ധൈര്യമില്ല. പിന്നെങ്ങനെ കേസെടുക്കും?​

ഒടുവിൽ, തേടിയ വള്ളി കാലിൽ ചുറ്റി. യുവതി മുഖ്യമന്ത്രിക്കു മുന്നിലെത്തി,​ പീഡന പരാതി എഴുതി നൽകി. ക്രൈംബ്രാഞ്ച് അന്വേഷണം മാങ്കൂട്ടത്തിലേക്ക്. ചർച്ചാവിഷയം മാറി. ശൂല പിടിച്ചവൻ പാല്പായസം കണ്ട അവസ്ഥയിൽ ഭരണപക്ഷം. ഇടി വെട്ടിയവനെ പാമ്പു കടിച്ച സ്ഥിതിയിൽ കോൺഗ്രസ്. മുന്നണികളിലെ മുട്ടനാടുകളുടെ ഏറ്റുമുട്ടലിനിടെ ചോര കുടിക്കാൻ കൊതിച്ച് ബി.ജെ.പിയും. കേസിൽ വീണ്ടും ട്വിസ്റ്റ്. വാദി പ്രതിയാകുമെന്നാണ് രാഹുൽ അനുകൂലികളുടെ വാദം. യുവതിയുമായി പരസ്പര സമ്മത പ്രകാരമാണ് ബന്ധപ്പെട്ടതെന്നും, ഗർഭിണിയാക്കിയത് താനല്ല, അവരുടെ ഭർത്താവാണെന്നും മുൻകൂർ ജാമ്യ ഹർജിയിൽ രാഹുൽ!

പക്ഷേ, വിവാഹം കഴിഞ്ഞ് ഒരു മാസത്തിനകം വിവാഹബന്ധം ഒഴിഞ്ഞെന്നും അതിനു ശേഷമാണ് രാഹുലുമായി താൻ സൗഹൃദത്തിലായതെന്നും പരാതിക്കാരി. അപ്പോൾ അത് ആരുടെ ഗർഭം?​ രാഹുലിന്റേതു തന്നെയെന്ന് യുവതി. യുവതി ഗർഭഛിദ്രം നടത്തിയത് താൻ പറഞ്ഞിട്ടല്ലെന്ന് രാഹുൽ. അപ്പോൾ, ഗർഭഛിദ്രം നടത്തിയില്ലെങ്കിൽ കൊല്ലാനും മടിക്കില്ലെന്ന് ഭീഷണിപ്പെടുത്തുന്നതായി പ്രചരിക്കുന്ന ശബ്ദസന്ദശം രാഹുൽ നിഷേധിക്കാത്തതെന്ത്? 'കനകം മൂലം, കാമിനി മൂലം കലഹം പലവിധമുലകിൽ സുലഭം."

 

കോൺഗ്രസിൽ രാഹുൽ മാങ്കൂട്ടത്തിലിനെതിരെ ആദ്യം മുഷ്ടി ചുരുട്ടി ചാടി വീണ സിംഹരാജാവ് വി.ഡി. സതീശനും സിംഹിണികളും രാഹുൽ അനുകൂല സൈബർ പോരാളികളുടെ കടന്നാക്രമണത്തിൽ മാളത്തിലൊതുങ്ങി. സതീശൻ സംരക്ഷകരായി വളർത്തിക്കൊണ്ടുവന്ന ഷാഫി- രാഹുൽ യൂത്ത് ബ്രിഗേഡ് പുതിയ ലീഡറെ തേടിപ്പിടിച്ചു. രാഹുലിനെ 'ഗുഡ് ബോയ്" ആക്കാൻ ശ്രമിച്ച കുമ്പക്കുടി സുധാകരനും, രാഹുലിനെ കോൺഗ്രസിൽ നിന്ന് പുറത്താക്കി പടിയടച്ച് പിണ്ഡം വയ്ക്കണമെന്നു പറഞ്ഞ യൂത്ത് കോൺഗ്രസ് വനിതാ നേതാവിനും കിട്ടി,​ സൈബർ കല്ലേറ്.

രണ്ടു കാലിലും മന്തുള്ളവൻ ഒരു വിരലിൽ മന്തുള്ളവനെ നോക്കി 'മന്തുകാലാ" എന്നു വിളിച്ചാലോ?.ഈ അവസ്ഥയിലാണ് സി.പി.എം. സ്ത്രീ പീഡനക്കേസിൽ പ്രതിയായ എം. മുകേഷ് എം.എൽ.എ സ്ഥാനത്ത് തുടരുമ്പോൾ രാഹുലിന്റെ രാജി എങ്ങനെ ആവശ്യപ്പെടും? എന്തായാലും ശബരിമല വിഷയം തദ്ദേശ തിരഞ്ഞെടുപ്പ് വരെയെങ്കിലും അടിയിലായി! എന്നാൽ,സി.പിഎമ്മുകാരായ രണ്ട് മുൻ ബോർഡ് പ്രസിഡന്റുമാർ സ്വർണക്കൊള്ള കേസിൽ അകത്തായിട്ടും പാർട്ടി നടപടി എടുക്കാത്തത് എന്തെന്ന ചോദ്യമുയർത്തി ശബരിമല വിഷയം വീണ്ടും ചൂടു പിടിപ്പിക്കാനാണ് കോൺഗ്രസ് നേതാക്കളുടെ ശ്രമം.

 

പേരിനൊപ്പം മാങ്കൂട്ടത്തിൽ എന്നുണ്ടെങ്കിലും വിളയാതെ പഴുത്ത മാങ്ങയാണ് രാഹുൽ എന്നാണ് കോൺഗ്രസിലെ തന്നെ പലരുടെയും അഭിപ്രായം. താഴേത്തലം മുതൽ ഉശിരുള്ള സംഘടനാ പ്രവർത്തനം വഴിയല്ല, ചാനലുകളിലെ അന്തിച്ചർച്ചകളിൽ എതിരാളികളെ വീറോടെ മലർത്തിയടിച്ചാണ് രാഹുൽ താരമായത്. ഗോഡ് ഫാദർമാരായി സതീശനും ഷാഫി പറമ്പിലും. പത്തനംതിട്ടക്കാരനായ രാഹുൽ പലരെയും കടത്തിവെട്ടി പാലക്കാട്ടെ എം.എൽ.എയും, യൂത്ത് കോൺഗ്രസ് സംസ്ഥാന പ്രസിഡന്റുമായി. പാർട്ടിയിലെ യൂത്ത്

ബ്രിഗേഡിന്റെ തലവനായി. പക്ഷേ, കക്ഷിയുടെ കൈയിലിരിപ്പ് കൊള്ളില്ലെന്ന് നേരത്തേതന്നെ വനിതാ സഹ പ്രവർത്തകർ ഉൾപ്പെടെ പാർട്ടിക്ക് പരാതി നൽകിയതാണ്. അന്നേ ചെവിക്കു പിടിക്കേണ്ട നേതൃത്വം കണ്ണടച്ചു. ഒടുവിൽ പാർട്ടിക്ക് കളങ്കമായി.

'നാറിയവനെ ചുമന്നാൽ ചുമന്നവനും നാറു"മെന്നാണ് കോൺഗ്രസ് എം.പി രാജ്മോഹൻ ഉണ്ണിത്താൻ

സ്വന്തം പാർട്ടി എം.എൽ.എയെപ്പറ്റി പറയുന്നത്. എഴുപതുകൾ മുതൽ കേരളത്തിലെ കോൺഗ്രസിനെ ജനകീയ പ്രക്ഷോഭങ്ങളിലൂടെ വളർത്തിയെടുത്ത ആന്റണിയും വയലാർ രവിയും ഉമ്മൻ ചാണ്ടിയും വി.എം സുധീരനും ഉൾപ്പെടെയുള്ളവർ ആദർശധീരതയുടെയും സംശുദ്ധിയുടെയും പര്യായങ്ങളായിരുന്നു. ആ സംസ്കാരവും ഔചിത്യവും കുറ്റിയറ്റതിന്റെ തിക്തഫലമാണ് പുതിയ തലമുറയിലെ മാങ്കൂട്ടവും പ്ലാന്തോട്ടവുമൊക്കെ നടത്തുന്ന അഴിഞ്ഞാട്ടം!

 

വിദ്യാർത്ഥികളെ കരുതി സുപ്രീം കോടതി എത്ര കൈകൂപ്പി അപേക്ഷിച്ചാലും, സർക്കാരും ഗവർണറും പിടിവാശി ഉപേക്ഷിച്ച് സംസ്ഥാനത്തെ സർവകലാശാലകളിൽ ഉടനെങ്ങും വൈസ് ചാൻസലർ നിയമനം നടത്തുമെന്ന പ്രതീക്ഷ വേണ്ട. ഡിജിറ്റൽ, സാങ്കേതിക സർവകലാശാലകളിലെ വി.സിമാരെ മുഖ്യമന്ത്രി മുൻഗണനാ ക്രമം നിശ്ചയിച്ച് നൽകുന്ന പാനലിൽ നിന്ന് ഗവർണർ നിയമിക്കണമെന്നാണ് സുപ്രീം കോടതി നിർദ്ദേശം. അതനുസരിച്ച് മുഖ്യമന്ത്രി നൽകിയ പാനലിൽ ചില പേരുകളല്ലാതെ, അവരുടെ വിശദാംശങ്ങളില്ലന്ന് ഗവർണർ. വി.സി നിയമനാധികാരി എന്ന നിലയിൽ അവരുടെ യോഗ്യതകൾ അറിയാനുള്ള അവകാശം തനിക്കുണ്ടെന്നും അദ്ദേഹം പറയുന്നു.

എന്നാൽ, മുഖ്യമന്ത്രി നൽകിയ പാനലിൽ വിശ്വാസമില്ലായ്മ പ്രകടിപ്പിച്ച് കേസ് നൽകുമെന്നു പറയുന്ന ഗവർണർ , സംസ്ഥാന സർക്കാരിനോട് യുദ്ധം പ്രഖ്യാപിച്ചതായാണ് മന്ത്രി ശിവൻകുട്ടിയുടെ ആരോപണം. ഇത് എവിടെച്ചെന്നു നിൽക്കും? സർവകലാശാലകളിൽ ഭരണസ്തംഭനം. വിദ്യാർത്ഥികളുടെ വിധി!

 

വല്യേട്ടനായ സി.പി.എം തങ്ങളെ വീണ്ടും ഇരുട്ടിൽ നിറുത്തിയതിലാണ് സി.പി.ഐക്കാർക്ക് വിഷമം. ഒച്ചവയ്ക്കാനാവുന്നില്ല. തിരഞ്ഞെടുപ്പാണ്; സഹിച്ചേ തീരൂ- ആദ്യം വിദ്യാഭ്യാസ വകുപ്പിൽ. ഇപ്പോൾ തൊഴിൽ വകുപ്പിലും! അന്ന് പി.എം.ശ്രീ പദ്ധതിയിൽ; ഇപ്പോൾ ലേബർ കോഡിൽ. രണ്ടിലും ഒപ്പിട്ടത് സൂചന പോലും നൽകാതെ,​ അതീവ രഹസ്യമായി. എങ്കിലും, മന്ത്രി വി. ശിവൻകുട്ടി സഖാവിന് ഈ ചതി വേണ്ടായിരുന്നു. പൂച്ച കണ്ണടച്ച് പാൽ കുടിക്കുന്നതു പോലെ, എല്ലാം ഒപ്പിച്ച ശേഷം ഒരു കള്ളച്ചിരി. സ്കൂളുകൾക്കുള്ള പി.എം.ശ്രീ പദ്ധതിയിൽ വകുപ്പ് സെക്രട്ടറിയെ ഡൽഹിക്കയച്ച് രഹസ്യമായി ഒപ്പിട്ട ശേഷം ഇവിടെ മരവിപ്പിക്കൽ ചർച്ച!

കേന്ദ്രത്തിന് കത്തയയ്ക്കാനുള്ള മന്ത്രിസഭാ തീരുമാനം രണ്ടാഴ്ച ചവിട്ടിപ്പിടിച്ചു. അതിനകം, കേന്ദ്ര ഫണ്ടിലെ

ആദ്യ ഗഡു ഒപ്പിച്ചു. കേന്ദ്രത്തിന്റെ പുതിയ ലേബർ കോഡിന് (തൊഴിൽ നിയമം) കേരളത്തിൽ

കരട് ചട്ടമുണ്ടാക്കിയത് ഇരുചെവിയറിയാതെ. അതും നാലുവർഷം മുമ്പ്. ഒടുവിൽ കള്ളി വെളിച്ചത്തായപ്പോൾ ഉരുണ്ടുകളി. കേന്ദ്ര നിർദ്ദേശം ഇവിടത്തെ ഉദ്യോഗസ്ഥർ പാലിച്ചതാണെന്നും, അന്തിമ വിജ്ഞാപനത്തിലേക്ക് പോയില്ലെന്നും വ്യാഖ്യാനം. പുതിയ ചട്ടം രൂപീകരിക്കുന്നതിന് തൊഴിലാളി യൂണിയനുകളുമായി ചർച്ച നടത്തുമെന്ന് മന്ത്രി പറഞ്ഞത് കോഡ് പ്രാബല്യത്തിൽ വന്നതിനു ശേഷമെന്നാണ് സി.പി.ഐക്കാരുടെ പരാതി. ഇങ്ങനെ പറ്റിക്കേണ്ടിയിരുന്നില്ല. തദ്ദേശ തിരഞ്ഞെടുപ്പു വരെ മിണ്ടാതിരിക്കാം. പിന്നാലെ വരുന്നു,​ നിയമസഭാ തിരഞ്ഞെടുപ്പ്. മിണ്ടാനൊക്കില്ല. എല്ലാം സഹിക്കുക; പൊറുക്കുക മാത്രം കരണീയം.

നുറുങ്ങ്:

■ ശബരിമലയിൽ എല്ലാം തീരുമാനിക്കുന്നത് തന്ത്രിയും മന്ത്രിയുമെന്ന് അഴിക്കുള്ളിലായ ദേവസ്വം ബോർഡ് മുൻ പ്രസിഡന്റ് എ. പത്മകുമാർ.

● ദൈവത്തെപ്പോലെ കരുതുന്നവർ ഒടുവിൽ കാപ്പാത്തുമോ?

(വിദുരരുടെ ഫോൺ: 99461 08221)