ഇലവീഴാപൂഞ്ചിറ മലനിരകളിൽ വൻ തീപിടിത്തം; സ്ഥലത്തുണ്ടായിരുന്നത് ആയിരക്കണക്കിന് വിനോദസഞ്ചാരികൾ

കോട്ടയം: ഇലവീഴാപൂഞ്ചിറ മലനിരകളിൽ വൻ തീപിടിത്തം. ഇന്നലെ ഉച്ചയോടെയാണ് മലനിരകളിൽ തീ പടർന്നുപിടിച്ചത്. തീ നിയന്ത്രണവിധേയമാക്കിയെങ്കിലും രാത്രിയോടെ വീണ്ടും പടർന്നു. നിലവിൽ സ്ഥിതിഗതികൾ നിരീക്ഷിക്കുന്നതിനും കൂടുതൽ അപകടങ്ങൾ ഒഴിവാക്കുന്നതിനുമായി അഗ്നിരക്ഷാ സേനയുടെ ഒരു യൂണിറ്റ് സ്ഥലത്ത് തുടരുകയാണ്.

ഇന്നലെ തീപിടിച്ചുവെന്ന വിവരം ലഭിച്ച ഉടൻതന്നെ ഈരാറ്റുപേട്ടയിൽ നിന്നും അഗ്നിരക്ഷാസേനയുടെ രണ്ട് വാഹനങ്ങൾ സ്ഥലത്തെത്തി. ദീർഘനേരത്തെ പരിശ്രമത്തിനൊടുവിൽ വൈകിട്ടോടെ നിയന്ത്രണ വിധേയമാക്കിയ തീ രാത്രിയോടെ വീണ്ടും പടരുകയായിരുന്നു.

ക്രിസ്‌മസ് ദിനമായതിനാൽ ഇലവീഴാപൂഞ്ചിറയിൽ വിനോദസഞ്ചാരികളുടെ വലിയ തിരക്കാണ് അനുഭവപ്പെട്ടത്. സഞ്ചാരികളുടെ ഭാഗത്ത് നിന്നുണ്ടായ അശ്രദ്ധയാണ് ഈ ദുരന്തത്തിന് കാരണമെന്നാണ് പ്രാഥമിക വിവരം.