പാക് അതിർത്തിയിൽ ആയുധശേഖരം പിടികൂടി

ചണ്ഡിഗർ: പഞ്ചാബിൽ ഇന്ത്യ-പാക് അതിർത്തിക്ക് സമീപം വൻ ആയുധ ശേഖരം കണ്ടെത്തി. സംഭവത്തിൽ പത്താൻകോട്ട് സ്വദേശിയായ ജസ്വന്ത് സിംഗ് എന്നയാളെ അറസ്റ്റ് ചെയ്തു. ആയുധങ്ങൾ കൈവശം വയ്ക്കുന്നതിന് ആവശ്യമായ ലൈസൻസോ മറ്റ് രേഖകളോ ഹാജരാക്കാൻ ഇയാൾക്ക് കഴിഞ്ഞില്ല. മൂന്ന് എ.കെ 47 റൈഫിളുകൾ,​ അഞ്ച് മാഗസിനുകൾ, രണ്ട് തുർക്കി,​ ചൈനീസ് നിർമ്മിത പിസ്റ്റളുകൾ,​ രണ്ട് പിസ്റ്റൾ മാഗസിനുകൾ, വിവിധ കാലിബറുകളിലുള്ള 98 ലൈവ് കാട്രിഡ്ജുകൾ ഉൾപ്പെടെയാണ് പൊലീസ് കണ്ടെടുത്തത്. പാകിസ്ഥാൻ കേന്ദ്രീകരിച്ച് പ്രവർത്തിക്കുന്ന കൊടുംകുറ്റവാളിയായ റിൻഡ അയച്ചവയാണിതെന്ന് കരുതുന്നു. അന്വേഷണം ഊർജ്ജിതമാക്കി.