'പാത്രം കഴുകുക മാത്രമല്ല നന്നായി പാചകം ചെയ്യാനും അദ്ദേഹത്തിനറിയാം', എം എ ബേബിക്ക് പിന്തുണയുമായി മന്ത്രി

തൃശൂർ: സിപിഎമ്മിന്റെ ഗൃഹസമ്പർക്ക പരിപാടിക്കിടെ താൻ ഭക്ഷണം കഴിച്ച പ്ളേറ്റ് സ്വയം കഴുകിവച്ച പാർട്ടി ജനറൽ സെക്രട്ടറി എം എ ബേബിയുടെ വീഡിയോ വൈറലായിരുന്നു. സ്വന്തം പാത്രം കഴുകുന്നത് നല്ല ശീലമെന്ന് പ്രശംസ അദ്ദേഹത്തിന് ഇതിന് പലകോണുകളിൽ നിന്ന് ലഭിച്ചു. എന്നാൽ ഭരണം പാർട്ടി സെക്രട്ടറിയെ ജനങ്ങളുടെ അടുക്കളയിൽ എത്തിച്ചു എന്നതരം വിമർശനവും ഇതിനിടെ ഉണ്ടാകുന്നുണ്ട്.

ഇതിനിടെ പാർട്ടി ജനറൽ സെക്രട്ടറിയ്‌ക്ക് പിന്തുണയുമായെത്തുകയാണ് വിദ്യാഭ്യാസ മന്ത്രി വി ശിവൻകുട്ടി. പരിഹാസങ്ങൾക്ക് പിന്നിൽ സാംസ്‌കാരിക ശൂന്യതയും ഫ്യൂഡൽ മനോഭാവവുമാണെന്ന് ശിവൻകുട്ടി കുറ്റപ്പെടുത്തി. ഡൽഹി എകെജി ഭവനിലായാലും തിരുവനന്തപുരത്ത് എകെജി സെന്ററിലായാലും കഴിച്ച പാത്രം സ്വയം കഴുകിവയ്‌ക്കുക എന്നത് തങ്ങളുടെ ശീലമാണെന്ന് അദ്ദേഹം പറഞ്ഞു. ബേബി എവിടെയായാലും സ്വന്തം പാത്രം കഴുകിവയ്‌ക്കുന്ന ശീലമുള്ളയാളും നന്നായി പാചകം ചെയ്യാനറിയുകയും ചെയ്യാമെന്നും മന്ത്രി വ്യക്തമാക്കുന്നു.

വി ശിവൻകുട്ടിയുടെ കുറിപ്പിലെ പ്രസക്ത ഭാഗങ്ങൾ:

ഗൃഹസന്ദർശനത്തിനിടെ ഭക്ഷണം കഴിച്ച പാത്രം സ്വയം കഴുകിവെച്ച സി.പി.എം ജനറൽ സെക്രട്ടറി സഖാവ് എം.എ ബേബിയെ പരിഹസിച്ചുകൊണ്ട് ചില കോണുകളിൽ നിന്ന് ഉയരുന്ന ട്രോളുകൾ ശ്രദ്ധയിൽപ്പെട്ടു. ആ പരിഹാസത്തിന് പിന്നിലുള്ളവരുടെ സാംസ്‌കാരിക ശൂന്യതയും ഫ്യൂഡൽ മനോഭാവവുമാണ് ഇതിലൂടെ വെളിച്ചത്തുവരുന്നത്.

കമ്മ്യൂണിസ്റ്റ് പാർട്ടിയെ സംബന്ധിച്ചിടത്തോളം ഇതൊരു പുതിയ കാര്യമല്ല. ഡൽഹിയിലെ എ.കെ.ജി ഭവനിലായാലും തിരുവനന്തപുരത്തെ എ.കെ.ജി സെന്ററിലായാലും മറ്റേത് ജില്ലാ കമ്മിറ്റി ഓഫീസിലായാലും, ഭക്ഷണം കഴിച്ച പാത്രം സ്വയം കഴുകി വെക്കുക എന്നത് ഞങ്ങളുടെ രീതിയും ശീലവുമാണ്. ബേബി സഖാവിനെ അടുത്തറിയുന്നവർക്ക്, അദ്ദേഹം എവിടെയായിരുന്നാലും സ്വന്തം പാത്രം കഴുകി വെക്കുന്ന ശീലം പണ്ടേയുള്ളതാണെന്നും, പാത്രം കഴുകുക മാത്രമല്ല നന്നായി പാചകം ചെയ്യാനും അദ്ദേഹത്തിന് അറിയാമെന്നും വ്യക്തമായി അറിയാം.

തുണികഴുകൽ, പാചകം, വീട് വൃത്തിയാക്കൽ, കക്കൂസ് കഴുകൽ തുടങ്ങിയ ജോലികൾ 'മോശപ്പെട്ട' പണികളാണെന്നും, അവയൊക്കെ സ്ത്രീകളോ അല്ലെങ്കിൽ സമൂഹത്തിലെ താഴെക്കിടയിലുള്ളവർ എന്ന് ഒരു വിഭാഗത്താൽ വിളിക്കപ്പെടുന്നവരോ മാത്രം ചെയ്യേണ്ടതാണെന്നും കരുതുന്നവർ ഇന്നും നമുക്കിടയിലുണ്ട്.

പുരുഷന്മാർ ഇതൊന്നും ചെയ്യാൻ പാടില്ലെന്നുള്ള പഴഞ്ചൻ ഫ്യൂഡൽ മാടമ്പിത്തരം ഉള്ളിൽ പേറുന്നവർക്ക്, ഒരാൾ സ്വന്തം പാത്രം കഴുകുന്നത് കാണുമ്പോൾ അസ്വസ്ഥത ഉണ്ടായേക്കാം. ഏതൊരു തൊഴിലിനും അന്തസ്സുണ്ടെന്നും, സ്വന്തം കാര്യം നോക്കുന്നത് ആത്മാഭിമാനത്തിന്റെ ഭാഗമാണെന്നും തിരിച്ചറിയാനുള്ള പക്വത ഇക്കൂട്ടർക്ക് ഇല്ലാതെ പോയി.