നാട്ടുകാർ തടഞ്ഞുവച്ച് കൈമാറിയ തമിഴ്നാട് സ്വദേശി പൊലീസ് കസ്റ്റഡിയി​ൽ മരി​ച്ചു

കാക്കനാട്: തൃക്കാക്കര പൊലീസ് വെള്ളിയാഴ്ച രാത്രി കസ്റ്റഡിയിലെടുത്ത തമിഴ്നാട് ഡിണ്ടിഗൽ ഏവള്ളൂർ സ്വദേശി ബാബുരാജ് (50) ഇന്നലെ പുലർച്ചെ 4ന് മരി​ച്ചു. മൂന്നു മണിയോടെ ഇയാൾക്ക് സ്റ്റേഷനിൽ ദേഹാസ്വാസ്ഥ്യം അനുഭവപ്പെട്ട് കുഴഞ്ഞുവീഴുകയായിരുന്നു. ഉടൻ തൃക്കാക്കര സഹകരണ ആശുപത്രിയിൽ പ്രവേശിപ്പിച്ചെങ്കി​ലും ജീവൻ രക്ഷി​ക്കാനായി​ല്ല.

വെള്ളിയാഴ്ച രാത്രി 11ന് കാക്കനാട് ചെമ്പുമുക്ക് പള്ളിക്ക് സമീപം ദുരൂഹമായി​ കണ്ടതി​നെ തുടർന്ന് നാട്ടുകാർ തടഞ്ഞുവച്ച് പൊലീസി​ൽ ഏൽപ്പി​ക്കുകയായി​രുന്നു. പൊലീസിന്റെ ചോദ്യങ്ങൾക്ക് ഇയാൾ വ്യക്തമായ മറുപടി നൽകി​യിരുന്നി​ല്ല. തൃക്കാക്കര സഹകരണ ആശുപത്രി​യി​ൽ മെഡിക്കൽ പരി​ശോധന നടത്തി​യാണ് സ്റ്റേഷനി​ലേക്ക് കൊണ്ടുവന്നത്.

ഡിണ്ടിഗലിലുള്ള ബന്ധുക്കൾ ഇന്നലെ തൃക്കാക്കരയിൽ എത്തി. മൃതദേഹം പോസ്റ്റ്മോർട്ടത്തിനായി കളമശേരി മെഡിക്കൽ കോളേജിലേക്ക് മാറ്റി.