പ്രീപ്രൈമറി ഓണറേറിയം വെട്ടിക്കുറച്ചു

നൽകിയത് പകുതി തുക

തിരുവനന്തപുരം: സംസ്ഥാനത്തെ സർക്കാർ സ്കൂളുകളോടനുബന്ധിച്ചുള്ള പ്രീ-പ്രൈമറി അദ്ധ്യാപകർക്കും ആയമാർക്കും പ്രഖ്യാപിച്ച ഓണറേറിയം തുക സർക്കാർ വെട്ടിക്കുറച്ചു. പകുതി തുകയാണ് അനുവദിച്ചത്. ഫണ്ട് ലഭ്യമാകുന്ന മുറയ്ക്ക് ബാക്കി നൽകുമെന്ന് ഉത്തരവിൽ പറയുന്നു.

പ്രീ-പ്രൈമറി അദ്ധ്യാപികമാരുടെ ഓണറേറിയമായി പ്രഖ്യാപിച്ച 13000- 13,500 രൂപയിൽ 7,600 രൂപ മാത്രമാണ് അനുവദിച്ചത്. ആയമാർക്ക് ലഭിക്കേണ്ട 8000- 8,500 രൂപ 4,500 രൂപയായി കുറച്ചു . ഓണറേറിയം വിതരണത്തിന് ആകെ 3,02,80,500 രൂപയാണ് അനുവദിച്ചത്. സാമ്പത്തിക വർഷം അവസാനിക്കാനിരിക്കെ കുഞ്ഞുങ്ങളെ പരിപാലിക്കുന്ന ജീവനക്കാരുടെ അന്നം മുട്ടിക്കുന്ന നടപടി പ്രതിഷേധാർഹമാണെന്ന് കെ.പി.എസ്.ടി.എ ആരോപിച്ചു. ഈ അനീതിക്കെതിരെ ശക്തമായ പ്രക്ഷോഭ പരിപാടികളുമായി മുന്നോട്ട് പോകുമെന്ന് സംസ്ഥാന പ്രസിഡന്റ് പി.കെ. അരവിന്ദൻ, ജനറൽ സെക്രട്ടറി ബി. സുനിൽകുമാർ എന്നിവർ അറിയിച്ചു.