എറണാകുളത്ത് പ്ലാറ്റ്‌ഫോം നവീകരണം;ട്രെയിനുകൾ റദ്ദാക്കി

തിരുവനന്തപുരം: എറണാകുളം ജംഗ്ഷൻ റെയിൽവേ സ്റ്റേഷനിൽ രണ്ടാമത്തെ പ്ലാറ്റ്‌ഫോം പുനരുദ്ധാരണ പ്രവർത്തനങ്ങൾ നടക്കുന്നതിനാൽ ഇന്ന് മുതൽ 26 വരെ ചില ട്രെയിൻ സർവീസുകൾ ഭാഗികമായി റദ്ദാക്കുകയും, ഒരു ട്രെയിൻ വൈകി ഓടുകയും ചെയ്യുമെന്ന് റെയിൽവേ അറിയിച്ചു.

പാലക്കാട് -എറണാകുളം മെമു ആലുവയിൽ യാത്ര അവസാനിപ്പിക്കും. ആലുവയിൽ നിന്നായിരിക്കും മടക്ക സർവ്വീസ് നടത്തുക. ഗുരുവായൂർ -എറണാകുളം പാസഞ്ചർ ഇടപ്പള്ളിയിൽ സർവീസ് അവസാനിപ്പിക്കും. കൊല്ലം-എറണാകുളം മെമു തൃപ്പൂണിത്തുറയിൽ യാത്ര അവസാനിപ്പിക്കും. തിരുവനന്തപുരം-എറണാകുളം വഞ്ചിനാട് എക്സ്പ്രസ് കോട്ടയത്ത് യാത്ര അവസാനിപ്പിക്കും. എറണാകുളം -കണ്ണൂർ ഇന്റർസിറ്റി ആലുവയിൽ നിന്നായിരിക്കും സർവീസ് ആരംഭിക്കുക. കൂടാതെ എം.ജി.ആർ ചെന്നൈ-ആലപ്പുഴ ഡെയിലി എക്സ്പ്രസ് 30 മിനിറ്റ് വൈകിയോടും.