കഴക്കൂട്ടത്ത് വീട്ടമ്മയ്ക്ക് കുത്തേറ്റു; അയൽവാസി കസ്റ്റഡിയിൽ ​

കഴക്കൂട്ടം: ചെമ്പഴന്തിയിൽ മുൻവൈരാഗ്യത്തിന്റെ പേരിൽ വീട്ടമ്മയെ അയൽവാസി കുത്തിപ്പരിക്കേൽപ്പിച്ചു. പറയ്ക്കോട് പനവിള വീട്ടിൽ മഞ്ജുവിനാണ് (45) പരിക്കേറ്റത്. അയൽവാസിയായ രാജുവിനെ (63) കഴക്കൂട്ടം പൊലീസ് കസ്റ്റഡിയിലെടുത്തു. ​കഴിഞ്ഞദിവസം രാത്രി പത്തരയോടെയാണ് സംഭവം. മഞ്ജുവിന്റെ വീട്ടിലെത്തിയ രാജു വീട്ടുകാരുമായി വാക്കുതർക്കത്തിലേർപ്പെടുകയും തുടർന്ന് കൈയിലുള്ള കത്തിയുമായി മഞ്ജുവിനെ കുത്തി വീഴ്ത്തുകയുമായിരുന്നു. ഗുരുതരമായി പരിക്കേറ്റ മഞ്ജുവിനെ ഉടൻ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ശരീരത്തിൽ പത്തൊൻപതോളം തുന്നലുകളുണ്ട്. ​ബഹളം കേട്ടെത്തിയ വാർഡ് കൗൺസിലർ അരുൺ വട്ടവിളയും നാട്ടുകാരും ചേർന്നാണ് മഞ്ജുവിനെ ആശുപത്രിയിലെത്തിച്ചത്. പ്രതിയും മഞ്ജുവും തമ്മിലുള്ള മുൻവൈരാഗ്യമാണ് ആക്രമത്തിന് പിന്നിലെന്ന് പൊലീസ് പറഞ്ഞു. പൊലീസ് കൂടുതൽ അന്വേഷണം നടത്തിവരികയാണ്.