സ്കൂൾ അടയ്ക്കുന്ന ദിവസം ആഘോഷങ്ങൾ വിലക്കി സർക്കുലർ

തിരുവനന്തപുരം: വാർഷിക പരീക്ഷ അവസാനിക്കുന്ന ദിവസവും മദ്ധ്യവേനലവധിക്കായി അടയ്ക്കുന്ന ദിവസവും സ്കൂളുകളിൽ ആഘോഷങ്ങൾ പാടില്ലെന്ന് പൊതുവിദ്യാഭ്യാസ ഡയറക്ടറുടെ ഉത്തരവ്. മുൻവർഷങ്ങളിൽ പരീക്ഷാദിനങ്ങളിൽ നടന്ന ആഘോഷങ്ങൾ അതിരുകടന്ന് അക്രമസംഭവങ്ങൾ റിപ്പോർട്ട് ചെയ്യപ്പെട്ടതിനെത്തുടർന്നാണ് മുൻകരുതൽ.

ഹയർ സെക്കൻഡറി, വി.എച്ച്.എസ്.ഇ പരീക്ഷകൾ മാർച്ച് 28-നും എസ്.എസ്.എൽ.സി പരീക്ഷ മാർച്ച് 30-നും അവസാനിക്കും. ഒന്ന് മുതൽ ഒൻപത് വരെ ക്ലാസുകളുടെ പരീക്ഷകൾ പൂർത്തിയാക്കി മാർച്ച് 31-നാണ് മദ്ധ്യവേനലവധിക്കായി സ്കൂൾ അടയ്ക്കുന്നത്. പരീക്ഷ കഴിഞ്ഞ് ഇറങ്ങുന്ന കുട്ടികൾ അച്ചടക്കരഹിതമായ പ്രവർത്തനങ്ങളിൽ ഏർപ്പെടുന്നില്ലെന്ന് അദ്ധ്യാപകർ ഉറപ്പുവരുത്തണം. കുട്ടികളെ സുരക്ഷിതമായി വീട്ടിലെത്തിക്കുന്നതിന് രക്ഷിതാക്കളുടെ സഹകരണം തേടണം. സ്കൂൾ പരിസരത്ത് ആവശ്യമെങ്കിൽ പൊലീസിന്റെ സഹായം തേടാമെന്നും സർക്കുലറിൽ വ്യക്തമാക്കുന്നു. ഈ നിർദ്ദേശങ്ങൾ എല്ലാ വർഷവും ബാധകമായിരിക്കുമെന്നും സ്കൂൾ മേധാവികൾ ഇത് കർശനമായി പാലിക്കണമെന്നും പൊതുവിദ്യാഭ്യാസ ഡയറക്ടർ അറിയിച്ചു