നീറ്റ് പി.ജി: കുറഞ്ഞ കട്ട് ഓഫ് മാർക്ക് നിശ്ചയിച്ചത് 28ന് പരിഗണിക്കും

ന്യൂഡൽഹി: നീറ്റ് പി.ജി പരീക്ഷയുമായി ബന്ധപ്പെട്ട് കുറഞ്ഞ കട്ട് ഓഫ് മാർക്ക് നിശ്ചയിച്ച കേന്ദ്ര നടപടിയിൽ ഏപ്രിൽ 28ന് സുപ്രീംകോടതി വാദം കേൾക്കും. കുറഞ്ഞ കട്ട് ഓഫ് മാർക്ക് മെഡിക്കൽ വിദ്യാഭ്യാസത്തിന്റെ നിലവാരത്തെ ഏതെങ്കിലും തരത്തിൽ ബാധിച്ചിട്ടുണ്ടോയെന്ന് പരിശോധിക്കും. ജസ്റ്റിസുമാരായ പി.എസ്. നരസിംഹ,​ അലോക് അരാധെ എന്നിവരടങ്ങിയ ബെഞ്ചാണ് ഇക്കാര്യം വ്യക്തമാക്കിയത്. രോഗികളുടെ സുരക്ഷ, പൊതുജനാരോഗ്യം, മെഡിക്കൽ പ്രൊഫഷന്റെ വിശ്വാസ്യത എന്നിവയെ ബാധിക്കുന്ന വിഷയമെന്ന് ചൂണ്ടിക്കാട്ടി സമർപ്പിച്ച ഹ‌ർജികളാണ് കോടതിക്കു മുന്നിലുള്ളത്.

2025-26 അദ്ധ്യയനവർഷത്തെ നീറ്റ് പി.ജി പരീക്ഷയിലായിരുന്നു കേന്ദ്രത്തിന്റെ ഇടപെടൽ. കഴിഞ്ഞ ജനുവരി 9ന് കേന്ദ്ര ആരോഗ്യമന്ത്രാലയം ഉത്തരവിറക്കി. പിന്നാലെ,​ മൂന്നാം റൗണ്ട് നീറ്റ് പി.ജി കൗൺസിലിംഗിലെ കട്ട് ഓഫ് മാർക്ക് കുറച്ചു. പുതുക്കിയ ഫലം ജനുവരി 13ന് പ്രസിദ്ധീകരിച്ചു. 95913 പേർക്ക് കൂടി ഇതോടെ കൗൺസിലിംഗിന് യോഗ്യത ലഭിച്ചെന്ന് നാഷണൽ ബോർഡ് ഒഫ് എക്‌സാമിനേഷൻസ് ഇൻ മെഡിക്കൽ സയൻസസ് സുപ്രീംകോടതിയെ അറിയിച്ചിരുന്നു.