മൊബൈൽ ഫോൺ വേണ്ട,​ ബൂത്തിൽ എത്തിയാൽ ആദ്യം ചെയ്യേണ്ടത് ഒരു കാര്യം; വോട്ടർമാർ ശ്രദ്ധിക്കേണ്ട കാര്യങ്ങൾ

തിരുവനന്തപുരം: സംസ്ഥാനത്ത് നാളെ 2.71 കോടി വോട്ടർമാർ പോളിംഗ് ബൂത്തിലേക്ക് എത്തും. 140 മണ്ഡലങ്ങളിലെയും വോട്ടർമാർ വോട്ടിംഗ് മെഷീനിൽ വിരൽ അമർത്തുന്നതോടെ സംസ്ഥാന ഭരണത്തിന്റെ വിധി നിർണയിക്കപ്പെടും. രണ്ടു ലക്ഷത്തോളം പേർ ഇതിനകം വീട്ടിലിരുന്നു വോട്ട് ചെയ്തു.

കണ്ണൂർ,കാസർകോട്,മലപ്പുറം,പാലക്കാട്,എറണാകുളം ജില്ലകളിൽ മാത്രമാണ് തിരക്ക് ക്രമീകരിക്കുന്നതിനു വേണ്ടിയുള്ള ഓക്സിലറി ബൂത്തുകളുള്ളത്. സംസ്ഥാനത്തെ 2040ബൂത്തുകൾ ക്രിട്ടിക്കൽ സ്വഭാവമുള്ളതാണ്. വനിത ഉദ്യോഗസ്ഥർ മാത്രമുള്ള 352ഉം ഭിന്നശേഷി ഉദ്യോഗസ്ഥർ കൈകാര്യം ചെയ്യുന്ന 37ഉം ബൂത്തുകളുമുണ്ട്. 884ബൂത്തുകൾ മാതൃകാബൂത്തുകളായിരിക്കും. സംസ്ഥാനത്ത് 140 പോളിംഗ് കളക്ഷൻ സെന്ററുകളും 43സ്ഥലങ്ങളിലായി 140 കൗണ്ടിംഗ് കേന്ദ്രങ്ങളും സജ്ജമാക്കിയിട്ടുണ്ട്.

വോട്ടർമാർ ശ്രദ്ധിക്കേണ്ട കാര്യങ്ങൾ
1. വോട്ടർ പട്ടികയിലെ പേര് ഉറപ്പാക്കുക
വോട്ട് ചെയ്യാൻ വോട്ടർ ഐഡി (EPIC) മാത്രം പോരാ, വോട്ടർ പട്ടികയിൽ നിങ്ങളുടെ പേര് ഉണ്ടായിരിക്കണം.

പരിശോധിക്കാൻ: voters.eci.gov.in സന്ദർശിക്കുക.

സ്ലിപ്പ്: ബി.എൽ.ഒ നൽകുന്ന വോട്ടർ ഇൻഫർമേഷൻ സ്ലിപ്പ് (VIS) കരുതുന്നത് ബൂത്തിലെ നടപടികൾ വേഗത്തിലാക്കാൻ സഹായിക്കും. (ശ്രദ്ധിക്കുക: ഇത് തിരിച്ചറിയൽ രേഖയായി ഉപയോഗിക്കാൻ കഴിയില്ല).

2. തിരിച്ചറിയൽ രേഖകൾ
നിങ്ങളുടെ കൈവശം വോട്ടർ ഐഡി കാർഡ് ഇല്ലെങ്കിൽ, കേന്ദ്ര തെരഞ്ഞെടുപ്പ് കമ്മീഷൻ അംഗീകരിച്ച താഴെ പറയുന്ന 12 രേഖകളിൽ ഏതെങ്കിലും ഒന്ന് ഹാജരാക്കാം:

ആധാർ കാർഡ് / പാൻ കാർഡ് / പാസ്‌പോർട്ട്.

ഡ്രൈവിംഗ് ലൈസൻസ്.

ബാങ്ക്/പോസ്റ്റ് ഓഫീസ് ഫോട്ടോ പാസ്ബുക്ക്.

തൊഴിലുറപ്പ് പദ്ധതി (MGNREGA) ജോബ് കാർഡ്.

ആയുഷ്മാൻ ഭാരത് ഹെൽത്ത് കാർഡ്.

പെൻഷൻ രേഖകൾ (ഫോട്ടോ സഹിതം).

സർക്കാർ ജീവനക്കാരുടെ ഐഡി കാർഡ്.

ഭിന്നശേഷിക്കാർക്കുള്ള UDID കാർഡ്.

3. പോളിങ് ബൂത്തിലെ നടപടിക്രമങ്ങൾ
ബൂത്തിലെത്തിയാൽ പാലിക്കേണ്ട ക്രമങ്ങൾ:

ഒന്നാം പോളിങ് ഓഫീസർ: നിങ്ങളുടെ പേരും ക്രമനമ്പറും പരിശോധിച്ച് ഉറപ്പുവരുത്തും.

രണ്ടാം പോളിങ് ഓഫീസർ: ഇടതുകൈ വിരലിൽ മഷി പുരട്ടുകയും വോട്ടർ രജിസ്റ്ററിൽ ഒപ്പ്/വിരലടയാളം രേഖപ്പെടുത്തുകയും ചെയ്യും. തുടർന്ന് നിങ്ങൾക്ക് ഒരു വോട്ടേഴ്സ് സ്ലിപ്പ് നൽകും.

മൂന്നാം പോളിങ് ഓഫീസർ: നിങ്ങളുടെ വിരലിലെ മഷി പരിശോധിച്ച ശേഷം വോട്ടിംഗ് മെഷീൻ സജ്ജമാക്കും (ബാലറ്റ് ബട്ടൺ അമർത്തും).

4. വോട്ട് രേഖപ്പെടുത്തുന്ന രീതി (EVM & VVPAT)
വോട്ട് ചെയ്യുക: മെഷീനിൽ നിങ്ങൾ ആഗ്രഹിക്കുന്ന സ്ഥാനാർത്ഥിയുടെ പേരിന് നേരെയുള്ള നീല ബട്ടൺ അമർത്തുക. ഉടൻ തന്നെ ഒരു ബീപ് ശബ്ദം കേൾക്കാം. ബട്ടൺ അമർത്തിയ ശേഷം, വോട്ടിംഗ് മെഷീന് അടുത്തുള്ള വിവിപാറ്റ് ബോക്സിലെ ഗ്ലാസിലൂടെ നിങ്ങൾ വോട്ട് ചെയ്ത സ്ഥാനാർത്ഥിയുടെ പേരും ചിഹ്നവും കാണാം. 7 സെക്കൻഡ് നേരം ഈ സ്ലിപ്പ് ദൃശ്യമാകും.

5. ബൂത്തിലെ സൗകര്യങ്ങൾ
മുതിർന്ന പൗരന്മാർക്കും ഭിന്നശേഷിക്കാർക്കും ക്യൂ നില്‍ക്കാതെ വോട്ട് ചെയ്യാൻ റാംപ് സൗകര്യവും വോളണ്ടിയർമാരുടെ സഹായവും ലഭിക്കും. പോളിംഗ് ബൂത്തിനുള്ളിൽ മൊബൈൽ ഫോൺ ഉപയോഗിക്കുന്നത് കണിശമായി നിരോധിച്ചിരിക്കുന്നു.