വിവാഹാഭ്യർത്ഥന വീട്ടുകാർ നിരസിച്ചതിലെ വൈരാഗ്യം, 14കാരിയായ കബഡി താരത്തെ തെരുവിലിട്ട് കുത്തിക്കൊന്നു, പ്രതികളിൽ രണ്ട് പേർ പ്രായപൂർത്തിയാകാത്തവർ

പൂനെ: വിവാഹാഭ്യർത്ഥന വീട്ടുകാർ എതിർത്തതിന്റെ വൈരാഗ്യത്തിൽ 14കാരിയെ തെരുവിലിട്ട് കുത്തികൊലപ്പെടുത്തി. പൂനെയിലെ ബിബ്‌വേവാഡിയിൽ ഇന്നലെ വൈകിട്ടാണ് സംഭവം. കബഡി താരം കൂടിയായ പെൺകുട്ടി പരിശീലനത്തിന് പോകുമ്പോൾ ബൈക്കിലെത്തിയ പ്രതികൾ പെൺകുട്ടിയെ ആക്രമിക്കുകയായിരുന്നു. ശുഭം ഭഗവത്ത് എന്ന വ്യക്തിയാണ് പെൺകുട്ടിയെ കൊലപ്പെടുത്തിയത്. ഇയാളുടെ കൂടെ വന്ന പ്രായപൂർത്തിയാകാത്ത രണ്ട് പേരെ പൊലീസ് പിടികൂടിയിട്ടുണ്ട്. ശുഭം ഭഗവത്ത് ഒളിവിലാണ്.

ഇന്നലെ വൈകിട്ട് 5.45ഓടെയാണ് സംഭവമെന്ന് പൊലീസ് പറഞ്ഞു. കബഡി പരിശീലനകേന്ദ്രത്തിലേക്ക് പോകുന്ന വഴിയിൽ സുഹൃത്തുമായി സംസാരിച്ചു കൊണ്ടിരുന്ന പെൺകുട്ടിയെ ശുഭം ഭഗവത്തും കൂട്ടാളികളും ചേർന്ന് ആക്രമിക്കുകയായിരുന്നു. പെൺകുട്ടിയുടെ കഴുത്തിൽ നിരവധി തവണ കുത്തിയ പാടുകളുണ്ട്. സംഭവസ്ഥലത്തു വച്ച് തന്നെ പെൺകുട്ടി മരിച്ചു.

കൊല്ലപ്പെട്ട പെൺകുട്ടിയുടെ ബന്ധുവായ പ്രതി കുറച്ചു നാൾ ഇവരുടെ വീട്ടിൽ താമസിച്ചിരുന്നു. ആ സമയത്ത് എട്ടാം ക്ലാസിൽ പഠിക്കുന്ന പെൺകുട്ടിയോട് വിവാഹാഭ്യർത്ഥന നടത്തുകയും ഇതറിഞ്ഞ വീട്ടുകാർ ഇയാളെ വീട്ടിൽ നിന്ന് പുറത്താക്കുകയും ചെയ്തിരുന്നു. ഇതിന്റെ വൈരാഗ്യത്തിലാണ് പ്രതി കൊല നടത്തിയതെന്ന് പൊലീസ് പറഞ്ഞു.