മൂന്നുദിവസത്തിനുള്ളിൽ 300 കോടി കടന്ന് ബോളിവുഡ് സൂപ്പർ താരം ഷാരൂഖ് ഖാൻ ചിത്രം പഠാൻ. ജനുവരി 25ന് റിലീസ് ചെയ്ത ചിത്രം ആഗോളതലത്തിൽ 313 കോടി നേടിയെന്നാണ് കളക്ഷൻ റിപ്പോർട്ടുകൾ. ഷാരൂഖിനൊപ്പം ദീപിക പദുക്കോൺ,​ ജോൺ എബ്രഹാം എന്നിവരാണ് പ്രധാന വേഷങ്ങളിലെത്തുന്നത്. സൽമാൻ ഖാനും അതിഥി വേഷത്തിൽ എത്തുന്നുണ്ട്.

ഇന്ന് മാത്രം 38 കോടിയാണ് ചിത്രം കളക്ട് ചെയ്തത്. മൂന്നുദിവസത്തെ മൊത്തം കളക്ഷനായി 163 കോടിയാണ് പഠാൻ നേടിയത്. രാജമൗലി ചിത്രം ബാഹുബലി (127 കോടി)​,​ കെ.ജി.എഫ് 2 (140 കോടി)​ എന്നിവയുടെ വാരാന്ത്യ റെക്കോ‌ഡുകൾ പഠാൻ മറികടന്നു. റിലീസിംഗ് ദിവസം തന്നെ 55 കോടിയാണ് ചിത്രം നേടിയത്. കെ.ജി.എഫ് 2 ഹിന്ദി പതിപ്പിന്റെ റെക്കാഡാണ് പഠാൻ തകർത്തത്. 53.95 കോടിയാണ് കെ.ജി.എഫ് 2 നേടിയത്. രണ്ടാംദിവസം കളക്ഷൻ 68 കോടിയായി ഉയർന്നു. യാഷ് രാജ് ഫിലിംസിന്റെ സ്പൈ .യൂണിവേഴ്സിലെ ഒടുവിലത്തെ ചിത്രമാണ് പഠാൻ. ടൈഗർ സിന്ദാ ഹെ,​ വാർ എന്നിവയാണ് ഇതിന് മുമ്പുള്ള രണ്ട് സിനിമകൾ.