സിനിമയിലും ജീവിതത്തിലും ശോഭിക്കുന്ന വാക്കാണ് ഐ എ എസ്. പതിനായിരങ്ങൾ സ്വപ്നം കാണുന്ന ഈ പദവിയിലേക്ക് വർഷം തോറും എത്താനാവുന്നത് നൂറോളം പേർക്ക് മാത്രമാണ്. യുപിഎസ്സി നടത്തുന്നു ഇന്ത്യയിലെ ഏറ്റവും കഠിനമായ പരീക്ഷയിലൂടെയാണ് ഈ വിശിഷ്ട പദവിയിലേക്ക് കഴിവുള്ളവരെ കണ്ടെത്തുന്നത്. ഓരോ വർഷവും രാജ്യത്തുടനീളമുള്ള ലക്ഷക്കണക്കിന് ഉദ്യോഗാർത്ഥികൾ യുപിഎസ്സി പരീക്ഷ എഴുതുന്നുണ്ടെങ്കിലും അവരിൽ കുറച്ചുപേർ മാത്രമേ വിജയിക്കുന്നുള്ളൂ.

ഐ എ എസ് ഓഫീസർമാർക്ക് മികച്ച ശമ്പളമാണ് രാജ്യം നൽകുന്നത്. ഏഴാം ശമ്പള കമ്മീഷൻ അനുസരിച്ച്, ഏതൊരു ഐഎഎസുകാരന്റെയും അടിസ്ഥാന ശമ്പളം 56100 രൂപയാണ്. ശമ്പളത്തിന് പുറമെ ഉദ്യോഗസ്ഥർക്ക് യാത്രാ അലവൻസ്, ഡി എ ഉൾപ്പെടെയുള്ള മറ്റ് അലവൻസുകളും ലഭിക്കും. ഒരു ഐഎഎസുകാരന്റെ ആകെ ശമ്പളം പ്രതിമാസം ഒരു ലക്ഷം രൂപയിലധികമാണ്. എന്നാൽ ഐഎഎസ് ഉദ്യോഗസ്ഥൻ ക്യാബിനറ്റ് സെക്രട്ടറി റാങ്കിലെത്തിയാൽ ശമ്പളം പ്രതിമാസം 2,50,000 രൂപയിലെത്തും.

മറ്റ് ആനുകൂല്യങ്ങൾ

ഭവനം : ഐഎഎസ് ഉദ്യോഗസ്ഥർക്ക് താമസിക്കുന്നതിനായി ബംഗ്ലാവുകളോ റെസിഡൻഷ്യൽ യൂണിറ്റുകളോ അനുവദിക്കാറുണ്ട്. ഉദ്യോഗസ്ഥരുടെ റാങ്ക്, ശമ്പള സ്‌കെയിൽ, സീനിയോറിറ്റി എന്നിവ അനുസരിച്ചാണ് ഇവ അനുവദിക്കുക

വാഹനം : റാങ്കിന്റെ അടിസ്ഥാനത്തിലാണ് ഐഎഎസ് ഉദ്യോഗസ്ഥർക്കും വാഹനങ്ങൾ നൽകുന്നത്.

ഐ എ എസ് ഉദ്യോഗസ്ഥർക്ക് വൈദ്യുതി, വെള്ളം, ഗ്യാസ്, ഫോൺ കണക്ഷനുകൾ തുടങ്ങിയവയും സൗജന്യമായോ, ചെറിയ നിരക്കിലോ നൽകാറുണ്ട്.

ഇതിന് പുറമേ ഐഎഎസ് ഉദ്യോഗസ്ഥർക്ക് പെൻഷനും മറ്റ് ആനുകൂല്യങ്ങൾക്കും അർഹതയുണ്ട്.