ഗോകുലത്തി​ന്റെ പ്രതീക്ഷ മങ്ങുന്നു

മൊഹമ്മദൻസിനോട് 1-2ന് തോറ്റു, കിരീടപ്രതീക്ഷകൾ തകരുന്നു

കൊൽക്കത്ത : തുടർച്ചയായ മൂന്നാം മത്സരത്തിലും വിജയം കാണാനാവാതെ വന്നതോടെ ഐ ലീഗ് ഫുട്ബാളിൽ കഴിഞ്ഞ രണ്ട് സീസണുകളിലും സ്വന്തമാക്കിയിരുന്ന കിരീടം നിലനിറുത്താമെന്ന ഗോകുലം കേരള എഫ്.സിയു‌ടെ മോഹം മങ്ങുന്നു. ഇന്നലെ കൊൽക്കത്താ ക്ളബ് മൊഹമ്മദൻസിനോട് 2-1ന് തോറ്റ ഗോകുലം 16 കളികളിൽ നിന്ന് 24 പോയിന്റുമായി നാലാം സ്ഥാനത്താണ്. ശേഷിക്കുന്ന ആറുമത്സരങ്ങളും ജയിച്ചാലും കി​രീടം നി​ലനി​റുത്തുക അത്ര എളുപ്പമാവി​ല്ല. ഇപ്പോൾ 37 പോയിന്റുമായി ഒന്നാം സ്ഥാനത്തുള്ള ശ്രീനിധി ഡെക്കാന് ഇനി​യും ജയി​ച്ചാൽ ഗോകുലത്തി​ന് തി​രി​ച്ചടി​യാവും.

ഈ സീസണിലെ ആദ്യ മത്സരത്തിൽ മൊഹമ്മദൻസിനെ തോൽപ്പിച്ച് തുടങ്ങിയ ഗോകുലമാണ് ഇന്നലെ ആദ്യ ഗോൾ സ്കോർ ചെയ്തത്. എന്നാൽ മൊഹമ്മദൻസ് തി​രി​ച്ചടി​ച്ച് ജയി​ക്കുകയായി​രുന്നു. 13-ാം മിനിട്ടിൽ അബ്ദുൽ ഹക്കുവിലൂടെയായിരുന്നു ഗോകുലം ഗോളടിച്ചത്. ഈ ഗോളിന് ആദ്യ പകുതിയിൽ കേരള ക്ളബ് ലീഡ് ചെയ്തു. എന്നാൽ 67-ാം മിനിട്ടിൽ അബിയോള ദൗദയിലൂടെ മൊഹമ്മദൻസ് തിരിച്ചടിച്ചു. സമനിലയിലവസാനിക്കുമെന്ന് കരുതിയ മത്സരത്തിന്റെ ഇൻജുറി ടൈമിൽ കീൻ ലെവിസാണ് കൊൽക്കത്താ ക്ളബിന്റെ വിജയഗോളടിച്ചത്.

ഗോകുലത്തിന്റെ തുടർച്ചയായ മൂന്നാം തോൽവിയായിരുന്നു ഇന്നലത്തേത്. നെറോക്ക,റൗണ്ട്ഗ്ളാസ് പഞ്ചാബ് എന്നിവരോടായിരുന്നു ഇതിനുമുമ്പുളള തോൽവികൾ.