ആർട്ടെമിസ് 2 അടുത്ത വർഷം

വാഷിംഗ്ടൺ : അര നൂറ്റാണ്ടിന് ശേഷം മനുഷ്യനെ വീണ്ടും ചന്ദ്രനിലെത്തിക്കാനുള്ള നാസയുടെ സ്വപ്ന പദ്ധതിയായ ആർട്ടെമിസ് മിഷന്റെ ഭാഗമായ ആർട്ടെമിസ് - 2, 2024 നവംബർ അവസാനം ഉണ്ടാകുമെന്ന് നാസ. ആർട്ടെമിസ് 1 ദൗത്യത്തിലെ ആളില്ലാ പേടകമായ ഒറിയോൺ ഡിസംബറിൽ വിജയകരമായി ഭൂമിയിൽ തിരികെയെത്തിയിരുന്നു.

നാല് യാത്രികരുമായി കുതിച്ചുയരുന്ന ആർട്ടെമിസ് 2 ചന്ദ്രന്റെ അടുത്തുകൂടി പറന്ന് ഭൂമിയെ രണ്ട് തവണ ഭ്രമണം ചെയ്ത് തിരിച്ചെത്തും. ഈ വർഷം അവസാനത്തോടെ ആർട്ടെമിസ് 2ലെ യാത്രികരെ നാസ പ്രഖ്യാപിക്കും. യാത്രികരിൽ ഒരാൾ കനേഡിയനാണെന്ന് വിവരമുണ്ട്. ആർട്ടെമിസ് 2 വിജയിച്ചാൽ ആർട്ടെമിസ് 3 യിലൂടെ നാല് യാത്രികരെ ചന്ദ്രോപരിതലത്തിലിറക്കും.

ഇത് 2025ലുണ്ടായേക്കുമെങ്കിലും കാലതാമസം നേരിട്ടേക്കാം. ചന്ദ്രനിൽ ആദ്യമായി ഒരു വനിത, കറുത്ത വർഗ്ഗ വ്യക്തി എന്നിവരെ എത്തിക്കുകയാണ് ആർട്ടെമിസ് 3 യുടെ ലക്ഷ്യം. 1972ൽ അപ്പോളോ 17ലൂടെയാണ് മനുഷ്യൻ അവസാനമായി ചന്ദ്രനിലിറങ്ങിയത്. 12 പേരാണ് ഇതുവരെ ചന്ദ്രനിൽ കാലുകുത്തിയത്.