ന്യൂഡൽഹി: കഴിഞ്ഞ സാമ്പത്തിക വർഷത്തിൽ (2022-23) രാജ്യത്തെ വാഹന വില്പനയിൽ വൻനേട്ടമെന്ന് റിപ്പോർട്ട്. മികച്ച ഡിമാൻഡും പുതിയ സാമ്പത്തിക വർഷത്തിൽ വില വർദ്ധിക്കുന്നതും വില്പന കൂടുന്നതിന് പ്രധാന കാരണമായി. പ്രധാനമായും മാരുതി സുസുക്കി, ഹ്യുണ്ടായ് മോട്ടോർ ഇന്ത്യ, ടാറ്റ മോട്ടോഴ്സ് എന്നീ മൂന്ന് മുൻനിര വാഹന നിർമ്മാതാക്കളാണ് കൂടുതൽ നേട്ടം കൈവരിച്ചത്. രണ്ടക്കവളർച്ച നേടിയെന്നാണ് പ്രധാന കമ്പനികൾ അവകാശപ്പെടുന്നത്.
മാരുതി സുസുക്കി
19,66,164 വാഹനങ്ങൾ വിറ്റഴിച്ച് ഇന്ത്യയിലെ മുൻനിര വാഹനനിർമാതാക്കളായ മാരുതി സുസുക്കി കഴിഞ്ഞ സാമ്പത്തികവർഷം എക്കാലത്തെയും മികച്ച നേട്ടമാണുണ്ടാക്കിയത്. 19 ശതമാനം വളർച്ചയാണ് ഉണ്ടാക്കിയത്. ആഭ്യന്തര വിപണിയിലെ വില്പന 17,06,831 യൂനിറ്റായി ഉയർന്നു. കഴിഞ്ഞ വർഷം ഇത് 14,14,277 യൂനിറ്റ് ആയിരുന്നു. കയറ്റുമതിയിലും വൻ വർദ്ധനയാണ് നേടിയത്. കഴിഞ്ഞ വർഷം- 2,38,376 യൂണിറ്റ്. ഇത്തവണ 259,333 യൂണിറ്റ്.
എന്നാൽ മാർച്ച് മാസത്തിൽ വില്പനയിൽ കുറവുണ്ടായി. 2022 മാർച്ചിൽ 1,70,395 വാഹനങ്ങൾ വിറ്റഴിച്ചപ്പോൾ ഈവർഷത്തെ വില്പന 1,70,071 ആയി കുറഞ്ഞു.ആൾട്ടോ, എസ്.പ്രസ്സോ, ബലേനോ സെലേറിയോ തടുങ്ങിയ വാഹനങ്ങളുടെയെല്ലാം വിലപ്ന ഇടിഞ്ഞപ്പോൾ ബ്രെസ, എർട്ടിഗ, എസ്-ക്രോസ്, എക്സ്.എൽ6, ഗ്രാൻഡ് വിറ്റാര എന്നിവ വില്പന നേട്ടം കൈവരിച്ചു.
ടാറ്റ മോട്ടോഴ്സ്
വില്പനയിൽ 35% വളർച്ചയാണ് കഴിഞ്ഞ സാമ്പത്തിക വർഷം ടാറ്റ മോട്ടോഴ്സ് നേടിയത്. മുമ്പത്തെ സാമ്പത്തിക വർഷം 6,92,554 വാഹനങ്ങൾ ആഭ്യന്തര വിപണിയിൽ വിറ്റഴിച്ചപ്പോൾ ഇത്തവണ 9,31,957 എണ്ണമാണ് വിറ്റത്. യാത്രാവാഹനങ്ങളുടെ വില്പന 3,70,372 യൂണിറ്റിൽനിന്ന് 5,38,640 ആയി ഉയർന്നു. വാണിജ്യ വാഹനങ്ങളുടെ വില്പനയിൽ 16 ശതമാനം ഉയർന്ന് 4,13,539 യൂണിറ്റ് ആയെന്ന് കമ്പനി അവകാശപ്പെടുന്നു.
ഹ്യൂണ്ടായി മോട്ടോർ ഇന്ത്യ
മുൻ വർഷത്തേക്കാൾ 17.9 ശതമാനം വളർച്ചയോടെ ഹ്യൂണ്ടായി മോട്ടോർ ഇന്ത്യയും ഏറ്റവും ഉയർന്ന വില്പനയാണ് കഴിഞ്ഞ സാമ്പത്തിക വർഷം ഉണ്ടായത്. ഈ കാലയളവിൽ 7,20,565 യൂണിറ്റുകളാണ് വിറ്റഴിച്ചത്. ആഭ്യന്തരവിപണിയിലും ഏറ്റവും ഉയർന്ന വില്പന കാഴ്ച വയ്ക്കാൻ ഹ്യൂണ്ടായിക്ക് കഴിഞ്ഞു. 5,67, 546 വാഹനങ്ങളാണ് ആഭ്യന്തരവിപണിയിൽ വിറ്റത്. പുതിയ ക്രെറ്റ, വെന്യൂ, അൽകാസർ, ഓറ, ഗ്രാൻഡ് ഐ10 നിയോസ് എന്നിവയാണ് കൂടുതലായും വിറ്റഴിച്ച മോഡലുകൾ.
ടൊയോട്ട
കഴിഞ്ഞ സാമ്പത്തികവർഷം വാഹനവിൽപനയിൽ 41 ശതമാനം നേട്ടം കൈവരിച്ചതായി ടൊയോട്ട കിർലോസ്കർ അവകാശപ്പെടുന്നു. 1,74,015 വാഹനങ്ങളാണ് വിറ്റത്. വില്പനയിൽ മുമ്പിൽ നിന്നത് ഇന്നോവ ഹൈക്രോസ്, അർബൻ ക്രൂസർ ഹൈറൈഡർ, ന്യൂ ഇന്നോവ ക്രിസ്റ്റ, ഹൈലക്സ് എന്നിവയാണ്.
മറ്റ് കമ്പനികളുടെ വില്പന
കിയ ഇന്ത്യ കഴിഞ്ഞ സാമ്പത്തികവർഷം 44 ശതമാനമാണ് വളർച്ച നേടി. വിറ്റത് 2,69,229 വാഹനങ്ങളാണ്. എം.ജി മോട്ടോർ ഇന്ത്യ 28 ശതമാനം വില്പന വളർച്ച കൈവരിച്ചു. 6051 വാഹനങ്ങളാണ് മാർച്ചിൽ വിറ്റത്. അതുൽ ഓട്ടോ ലിമിറ്റഡ് 25,549 വാഹനങ്ങളാണ് വിറ്റത്. മുൻവർഷത്തേക്കാൾ 59.07 ശതമാനമാണ് വളർച്ച.
ടി.വി.എസ് മോട്ടോർ കമ്പനി കഴിഞ്ഞ മാർച്ചിൽ വില്പനയിൽ മൂന്ന് ശതമാനം വളർച്ച കൈവരിച്ചു. 3,17,152 വാഹനങ്ങളാണ് കഴിഞ്ഞ മാസം വിറ്റത്. റോയൽ എൻഫീൽഡ് കഴിഞ്ഞ സാമ്പത്തികവർഷം 8,34,895 മോട്ടോർ സൈക്കിളുകൾ വിറ്റഴിച്ചു. മുൻവർഷത്തേക്കാൾ 39 ശതമാനം വളർച്ചയാണ് ഉണ്ടായത്. കയറ്റുമതി 23 ശതമാനം വർധിച്ച് 1,00,055 യൂനിറ്റാവുകയും ചെയ്തു.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |