അരലക്ഷം രൂപയുടെ മാരക ലഹരിമരുന്നുമായി യുവാവ് പിടിയിൽ

മഞ്ചേരി: അരലക്ഷം രൂപയോളം വിലവരുന്ന മാരക ലഹരിമരുന്നായ മെത്താഫിറ്റമിനുമായി യുവാവ് പിടിയിൽ. മഞ്ചേരി കോഴിക്കാട്ടുക്കുന്ന് സ്വദേശി വടക്കേതൊടി ചിറക്കൽ വീട്ടിൽ മുഹമ്മദ് അൽഷിദാണ് മഞ്ചേരി റെയ്ഞ്ച് എക്‌സൈസ് സംഘത്തിന്റെ പിടിയിലായത്. മഞ്ചേരി ടൗൺ കേന്ദ്രീകരിച്ച് വ്യാപകമായി രാസലഹരി വിൽപ്പന നടത്തുന്ന സംഘത്തെക്കുറിച്ച് എക്‌സൈസ് റേഞ്ച് ഉദ്യോഗസ്ഥർ നിരീക്ഷിച്ച് വരികയായിരുന്നു. തുടർന്നുള്ള അന്വേഷണത്തിലാണ് പ്രധാന വിൽപ്പനക്കാരനായ മുഹമ്മദ് അൽഷിദിനെ മഞ്ചേരി കോവിലകംകുണ്ടിൽ വച്ച് അറസ്റ്റ് ചെയ്തത് . യുവാക്കൾക്കിടയിൽ കല്ല് , പൊടി എന്നീ ഇരട്ടപ്പേരുകളിലാണ് മെത്താഫിറ്റമിൻ എന്ന രാസലഹരി വിതരണം ചെയ്തിരുന്നതെന്ന് പ്രതി എക്‌സൈസിനോട് പറഞ്ഞു.
മഞ്ചേരി റെയ്ഞ്ച് എക്‌സൈസ് ഇൻസ്‌പെക്ടർ ഇ.ടി.ഷിജു, പ്രിവന്റീവ് ഓഫീസർ എൻ.അബ്ദുൽ വഹാബ്, പ്രിവന്റീവ് ഓഫീസർ ഗ്രേഡ് എം.പി.മുഹമ്മദലി, സിവിൽ എക്‌സൈസ് ഓഫീസർമാരായ കെ.പി. സാജിദ് , ടി.ശ്രീജിത്ത്, വി.സച്ചിൻദാസ്, വനിതാ സിവിൽ എക്‌സൈസ് ഓഫീസർ സനീറ ,എക്‌സൈസ് ഡ്രൈവർ ഉണ്ണിക്കൃഷ്ണൻ തുടങ്ങിയവരാണ് സംഘത്തിൽ ഉണ്ടായിരുന്നത്.