ബീജിംഗ്: ആഗോള ഡിമാൻഡ് കുറഞ്ഞിട്ടും ഏപ്രിലിലെ കയറ്റുമതിയിൽ നേട്ടവുമായി ചൈന. ഏപ്രിലിൽ കയറ്റുമതി 8.5% ഉയർന്ന് 295.4 ബില്യൺ ഡോളറിലേക്ക് എത്തിയെന്ന് കസ്റ്റംസ് ഡാറ്റകൾ സൂചിപ്പിക്കുന്നു. മാർച്ചിൽ രേഖപ്പെടുത്തിയ 14.8% കയറ്റുമതി വളർച്ചയുടെ തുടർച്ചയാണ് ഏപ്രിലിലും പ്രകടമായത്. അതേസമയം വരും മാസങ്ങളിൽ കയറ്റുമതി കുറഞ്ഞേക്കുമെന്നും വിലയിരുത്തലുണ്ട്.
ഇറക്കുമതിയിൽ ഇടിവ്
കഴിഞ്ഞ വർഷം ഏപ്രിലിലെ അപേക്ഷിച്ച് കഴിഞ്ഞമാസം ഇറക്കുമതിയിൽ 7.9% ഇടിവുണ്ടായെന്നും ജനറൽ അഡ്മിനിസ്ട്രേഷൻ ഓഫ് കസ്റ്റംസിൽ നിന്നുള്ള കണക്കുകൾ വ്യക്തമാക്കുന്നു. ഏപ്രിലിൽ ഇറക്കുമതി 205.2 ബില്യൺ ഡോളറായി. മാർച്ചിൽ 1.4% ഇടിവാണ് ഇറക്കുമതിയിൽ പ്രകടമായിരുന്നത്. കഴിഞ്ഞ വർഷത്തെ അപേക്ഷിച്ച് യുഎസുമായും യൂറോപ്യൻ യൂണിയനുമായുള്ള വ്യാപാരത്തിൽ ഇടിവുണ്ടായി.
വർഷത്തിലെ ആദ്യ നാല് മാസങ്ങളിലെ കയറ്റുമതി 2022ലെ സമാന കാലയളവിനെ അപേക്ഷിച്ച് 2.5% വർധിച്ച് 1.12 ട്രില്യൺ ഡോളറിലെത്തി. മൊത്തം ഇറക്കുമതി ഇക്കാലയളവിൽ 7.3 ശതമാനം കുറഞ്ഞ് 822 ബില്യൺ ഡോളറിലെത്തി.
വ്യാപാര മിച്ചം വർദ്ധിച്ചു
കഴിഞ്ഞ വർഷം ഇതേ കാലയളവിനെ അപേക്ഷിച്ച് ചൈനയുടെ വ്യാപാര മിച്ചം ഏപ്രിലിൽ 82.3% വളർന്നു.
ഡിമാൻഡ് കുറവ്
ഫെഡറൽ റിസർവും യൂറോപ്പിലെയും ഏഷ്യയിലെയും കേന്ദ്ര ബാങ്കുകളും പലിശനിരക്ക് ഉയർത്തിയതിനെത്തുടർന്ന് ആഗോള ഉപഭോക്തൃ ആവശ്യകത ദുർബലമായി. സർവേ പ്രകാരം പുതിയ ഓർഡറുകളും കയറ്റുമതി ഓർഡറുകളും മുൻ മാസത്തെ അപേക്ഷിച്ച് ഏപ്രിലിൽ കുറഞ്ഞുവെന്ന് ചൈനീസ് മാനുഫാക്ചേർസ് പറയുന്നു. അതുകൊണ്ട് തന്നെ ഈ വർഷം മൊത്തത്തിൽ കയറ്റുമതി ദുർബലമാകുമെന്നാണ് അനലിസ്റ്റുകൾ വിലയിരുത്തുന്നത്.
ഈ വർഷം 5 % സാമ്പത്തിക വളർച്ചയാണ് ചൈന ലക്ഷ്യം വെക്കുന്നത്. മാർച്ചിലെ മികച്ച പ്രകടനത്തിൻറെ അടിസ്ഥാനത്തിൽ 6 % വളർച്ച വരെ സാധ്യമായേക്കുമെന്ന് വിലയിരുത്തുന്നു.
യു.എസ്. വ്യാപാരം കുറഞ്ഞു
യുഎസിലേക്കുള്ള കയറ്റുമതി കഴിഞ്ഞ വർഷം സമാന കാലയളവിവെ അപേക്ഷിച്ച് 6.5% കുറഞ്ഞ് ഏപ്രിലിൽ 43 ബില്യൺ ഡോളറിലെത്തി. ഇറക്കുമതി ഏപ്രിലിൽ 2.9% ഇടിഞ്ഞ് 13.3 ബില്യൺ ഡോളറായി. യുഎസുമായുള്ള ചൈനയുടെ വ്യാപാര മിച്ചം 7% കുറഞ്ഞ് 29.7 ബില്യൺ ഡോളറായി.
യൂറോപ്പുമായുള്ള വ്യാപാരവും ചുരുങ്ങി. യൂറോപ്യൻ യൂണിയനിലേക്കുള്ള കയറ്റുമതി ഏപ്രിലിൽ 17.7% കുറഞ്ഞ് 44.7 ബില്യൺ ഡോളറായി. ഇറക്കുമതി 38.6% ചുരുങ്ങി 23.4 ബില്യൺ ഡോളറായി. അതേസമയം, യൂറോപ്യൻ യൂണിയനുമായുള്ള ചൈനയുടെ വ്യാപാര മിച്ചം 31.5% വർധിച്ച് 21.3 ബില്യൺ ഡോളറിലെത്തി.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |