തൃശൂർ: യൂത്ത് കോൺഗ്രസ് സംസ്ഥാന സമ്മേളനം തൃശൂരിൽ 23 മുതൽ 26 വരെ നടക്കുമെന്ന് സംസ്ഥാന പ്രസിഡന്റ് ഷാഫി പറമ്പിൽ എം.എൽ.എ വാർത്താസമ്മേളനത്തിൽ അറിയിച്ചു. നീതി നിഷേധങ്ങളിൽ നിശബ്ദരാവില്ല, വിദ്വേഷ രാഷ്ട്രീയത്തോട് വിട്ടുവീഴ്ച്ചയില്ല എന്ന പ്രമേയത്തിൽ ഊന്നിയാണ് സമ്മേളനം .
21ന് സംസ്ഥാന വൈസ് പ്രസിഡന്റുമാരായ റിജിൽ മാക്കുറ്റി, റിയാസ് മുക്കോളി എന്നിവരുടെ നേതൃത്വത്തിൽ രക്തസാക്ഷി ഛായാചിത്രജാഥ കാസർകോട് പെരിയയിൽ നിന്നാരംഭിക്കും. 22ന് തിരുവനന്തപുരത്ത് നിന്ന് വൈസ് പ്രസിഡന്റുമാരായ കെ.എസ് ശബരിനാഥ്, എസ്.എം ബാലു എന്നിവർ നയിക്കുന്ന പതാക ജാഥ പുറപ്പെടും. സംസ്ഥാന വൈസ് പ്രസിഡന്റുമാരായ എൻ.എസ് നുസൂർ, എസ്.ജെ പ്രേംരാജ് എന്നിവർ നയിക്കുന്ന കൊടിമര ജാഥ വൈക്കത്ത് നിന്നാരംഭിക്കും. 23ന് വൈകീട്ട് തൃശൂർ നഗരത്തിൽ മൂന്ന് യാത്രകളും സമാപിക്കും. സാംസ്കാരിക സംഗമം 22ന് നടക്കും. 24ന് വൈകീട്ട് യൂത്ത് കോൺഗ്രസ് മുൻ സംസ്ഥാന പ്രസിഡന്റുമാർ, കമ്മിറ്റി അംഗങ്ങൾ എന്നിവർ പങ്കെടുക്കുന്ന കുടുംബസംഗമം പുഴയോരം ഗാർഡൻസിൽ നടക്കും. 25ന് വൈകിട്ട് മൂന്നിന് ലക്ഷം യൂത്ത് കോൺഗ്രസ് പ്രവർത്തകർ പങ്കെടുക്കുന്ന റാലി തൃശൂർ സ്വരാജ് റൗണ്ടിൽ സംഘടിപ്പിക്കും. വൈകിട്ട് പൊതുസമ്മേളനം തേക്കിൻകാട് മൈതാനിയിൽ രാഹുൽഗാന്ധി ഉദ്ഘാടനം ചെയ്യും. 26ന് പ്രതിനിധി സമ്മേളനം തൃശൂർ തിരുവമ്പാടി കൺവെൻഷൻ സെന്ററിൽ നടക്കും. 20ന് സൗഹൃദ ഫുട്ബാൾ മത്സരം സംഘടിപ്പിക്കും.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |