ഒരു മണിക്കൂർ കൊണ്ട് തീർക്കാമോ ഈ ഡെവിൾസ് ബ്രേക്ക്ഫാസ്റ്റ്

ലണ്ടൻ : വിവിധ തരത്തിലെ ഫുഡ് ചലഞ്ചുകളും ഫുഡ് കോംബറ്റീഷനുകളും ഇന്ന് സോഷ്യൽ മീഡിയയിൽ തരംഗമാവുകയാണ്. റെക്കാഡ് സമയത്തിനുള്ളിൽ ഭക്ഷണം കഴിച്ചുതീർക്കുന്ന മത്സരങ്ങൾ കാണാൻ പലർക്കും താത്പര്യമേറെയാണ്. അടുത്തിടെ,​ യു.എസിൽ സ്വാതന്ത്ര്യ ദിനാഘോഷങ്ങളുടെ ഭാഗമായി ഒരു ഹോട്ട്ഡോഗ് ഈറ്റിംഗ് കോംബറ്റീഷൻ നടത്തിയത് ഏറെ ശ്രദ്ധനേടിയിരുന്നു. ഇപ്പോഴിതാ ഒരു ബ്രിട്ടീഷ് റെസ്റ്റോറന്റ് തുടക്കമിട്ട ഒരു ബ്രേക്ക്ഫാസ്റ്റ് ചലഞ്ച് സോഷ്യൽ മീഡിയയിൽ വൈറലാവുകയാണ്. ' ഡെവിൾസ് ബ്രേക്ക്ഫാസ്റ്റ് ചലഞ്ച്' അല്ലെങ്കിൽ ' 666 ബ്രേക്ക്ഫാസ്റ്റ് ' എന്നാണ് ഇതിന്റെ പേര്. ലെസ്റ്റഷറിലെ എല്ലിസ്ടൗണിലുള്ള കോപ്പർ കെറ്റിൽ എന്ന റെസ്റ്റോറന്റാണ് ചലഞ്ച് അവതരിപ്പിച്ചിരിക്കുന്നത്. വളരെ ഗംഭീരമായ മെനുവാണ് ഈ ചലഞ്ചിലൂടെ അവതരിപ്പിക്കുന്നത്. ഏകദേശം 2,334 രൂപയാണ് ഈ ബ്രേക്ക്ഫാസ്റ്റിന്റെ വില. എന്നാൽ ഒരു മണിക്കൂറിനുള്ളിൽ ഇത് കഴിച്ചു തീർത്താൽ പൈസ കൊടുക്കേണ്ട. മാത്രമല്ല ഒരു ടി - ഷർട്ട് സമ്മാനമായി ലഭിക്കും. ഒപ്പം വിജയിയുടെ ചിത്രം റെസ്റ്റോറന്റിന്റെ ചുവരിൽ പതിപ്പിക്കുകയും ചെയ്യും. ' 6 ' എന്ന സംഖ്യയും ഈ ചലഞ്ചുമായി ചില ബന്ധങ്ങളുണ്ട്. ബ്രേക്ക്ഫാസ്റ്റിൽ ഉൾപ്പെടുത്തിയിരിക്കുന്ന ഓരോ ഐറ്റവും ആറെണ്ണം വീതമാണുള്ളത്. അതായത്, ബേക്കൺ, സോസേജ്, മുട്ട, ഹാഷ് ബ്രൗൺസ്, പുഡ്ഡിംഗ്, തക്കാളി, മഷ്റൂം എന്നിവയെല്ലാം ആറെണ്ണം വീതമാണ്. ബ്രെഡ്, ബട്ടർ, ഫ്രൈഡ് / ടോസ്റ്റ് ബ്രെഡ് എന്നിവ ഓപ്ഷനായി തിരഞ്ഞെടുക്കാം. ചായയും കോഫിയും ഇഷ്ടാനുസരണം ലഭിക്കും. കഴിഞ്ഞ മൂന്ന് വർഷത്തിനിടെ നൂറിലേറെ പേർ ഈ ചലഞ്ച് പരീക്ഷിച്ചിതായി റെസ്റ്റോറന്റിന്റെ ഉടമകൾ പറയുന്നു. ഈ നൂറുപേരിൽ വെറും രണ്ട് പേർക്ക് മാത്രമാണ് ഈ ചലഞ്ച് ഒരു മണിക്കൂറിനുള്ളിൽ പൂർത്തിയാക്കാനായത്.