തിരുവനന്തപുരം: സിപിഎം നേതാക്കളുടെ ഭാര്യമാരെ സോഷ്യൽ മീഡിയയിലൂടെ അധിക്ഷേപിച്ച കേസിൽ യൂത്ത് കോൺഗ്രസ് പ്രവർത്തകന് ജാമ്യം. നെയ്യാറ്റിൻകര ചെങ്കൽ സ്വദേശി എബിൻ കോടങ്കരയെ (27)യാണ് തിരുവനന്തപുരം എസിജെഎം കോടതി ജാമ്യത്തിൽ വിട്ടത്. കോൺഗ്രസ് കോടങ്കര വാർഡ് പ്രസിഡന്റാണ് എബിൻ. എ എ റഹീം എംപിയുടെ ഭാര്യ അമൃത റഹീം, അന്തരിച്ച സിപിഎം നേതാവ് പി ബിജുവിന്റെ ഭാര്യ ഹർഷ എന്നിവർ നൽകിയ പരാതിയിലാണ് ഇയാൾ സൈബർ പൊലീസിന്റെ പിടിയിലായത്.

ഫേസ്‌ബുക്കിൽ താൻ പോസ്റ്റ് ചെയ്തിരുന്ന ചിത്രങ്ങൾ മോർഫ് ചെയ്ത് പ്രചരിപ്പിച്ചു എന്നാരോപിച്ചാണ് അമൃത റഹീം പരാതി നൽകിയത്. കോട്ടയം കുഞ്ഞച്ചൻ എന്ന വ്യാജ ഐഡിയിൽ നിന്നാണ് അപകീർത്തിപരമായ ചിത്രങ്ങൾ പ്രചരിപ്പിച്ചത്. എബിനാണ് ഈ ചിത്രങ്ങൾ തയ്യാറാക്കിയതെന്ന് സൈബർ പൊലീസ് നടത്തിയ അന്വേഷണത്തിൽ കണ്ടെത്തി. സിപിഎം വനിതാ നേതാക്കൾക്കെതിരെ ഇതേ പ്രൊഫൈലിൽ നിന്ന് പോസ്റ്റുകൾ വന്നിരുന്നതായും സൈബർ പൊലീസ് കണ്ടെത്തി.