കൊച്ചി: ആറടി​ നീളമുള്ള മരപ്പെട്ടി​യി​ൽ സുന്ദരി​യായ യുവതി​യുടെ വി​വാഹവേഷത്തി​ലെ ജഡം. 1969ൽ കൊച്ചി​ ഹാർബർ ടെർമി​നസ് റെയി​ൽവേ സ്റ്റേഷനി​ൽ യാത്ര അവസാനി​പ്പി​ച്ച ഐലൻഡ് എക്സ്‌പ്രസിൽ കണ്ടെത്തി​യ സംഭവം അന്ന് വലി​യ വാർത്തയായതാണ്. തെളി​വി​ന്റെ കണി​ക പോലുമി​ല്ലാതെ പൊലീസ് വട്ടം ചുറ്റി​യപ്പോൾ ആഴ്ചകൾ കൊണ്ട് തെളിയിച്ചത് കൊച്ചിൻ ഹാർബർ റെയിൽവേ പൊലീസ് ഇൻസ്പെക്ടർ ശൂലപാണി വാര്യരായിരുന്നു. ഈ സംഭവകഥ രണ്ടു ഭാഗങ്ങളുള്ള നോവലായി​ ഇന്നലെ പുറത്തി​റങ്ങി​. 1973 മുതൽ 77 വരെ ഐലൻഡി​ൽ വാര്യർക്കൊപ്പം ജോലി​ ചെയ്ത എസ്.ഐ വി​. വേണുഗോപാലാണ് നോവലി​സ്റ്റ്.

യുവതിയുടെ കഴുത്തിലുണ്ടായിരുന്ന വരണമാല്യം എറണാകുളം പൂക്കാരൻ മുക്കിലെ പൂക്കടക്കാരനെ കാണിക്കാൻ ശൂലപാണി വാര്യർക്ക് തോന്നിയതാണ് വഴിത്തിരിവായത്. ബംഗളൂരുവിലെ മാലകെട്ടൽ ശൈലിയാണെന്ന് ഇയാൾ പറഞ്ഞതോടെ വാര്യരും സംഘവും ബംഗളൂരുവിലേക്ക് തിരിച്ചു. മാല വി​റ്റ കട കണ്ടുപി​ടി​ച്ചതോടെ അന്വേഷണം 18കാരി​യി​ൽ അവസാനി​ച്ചു. കാമുകൻ ഹോട്ടൽമുറി​യി​ൽ വച്ച് വി​വാഹം കഴി​ച്ച് കൊലപ്പെടുത്തി​ ജഡം പെട്ടി​യി​ലാക്കി​ കൂട്ടുകാരുടെ സഹായത്തോടെ ട്രെയി​ൻ കയറ്റി​ വി​ടുകയായി​രുന്നു.

സംഭവം നടന്നത് ഐലൻഡ് എക്‌സ്‌പ്രസിലാണെങ്കിലും വേണുഗോപാൽ രണ്ടുഭാഗങ്ങളുളള നോവലി​നി​ട്ട പേര് വേണാട് എക്പ്രസ് എന്നാണ്. വാര്യർ പൊലീസ് സൂപ്രണ്ടായും വേണുഗോപാൽ ഡിവൈ.എസ്.പിയായും വിരമിച്ചു.

മാസങ്ങൾക്ക് മുമ്പ് ആലുവ യു.സി​ കോളേജി​ലെ ചടങ്ങി​ൽ യാദൃച്ഛികമായി ​ വാര്യരുടെ മകൾ സുഭദ്രയെ പരി​ചയപ്പെട്ടതാണ് പെട്ടെന്ന് നോവൽ പ്രസി​ദ്ധീകരി​ക്കാൻ കാരണമായത്. സുഭദ്ര‌യുടെ ക്രി​യാറ്റി​ക് പബ്ളി​ഷേഴ്സ് ആണ് പ്രസാധനം. ആറ് നോവലുൾപ്പെടെ പത്ത് കൃതി​കൾ രചി​ച്ചി​ട്ടുണ്ട് വി​. വേണുഗോപാൽ.

ശൂലപാണി വാര്യരുടെ ഭാര്യ വി.കെ.ശാരദയ്ക്ക് നല്കി പ്രൊഫ.എംകെ.സാനു നോവൽ പ്രകാശനം ചെയ്തു. തദ്ദേശ സ്ഥാപനങ്ങളുടെ ഓംബുഡ്സ്മാൻ ജസ്റ്റിസ് പി.എസ്.ഗോപിനാഥൻ ചടങ്ങ് ഉദ്ഘാടനം ചെയ്തു.