കാനഡയിലുണ്ടായ വാഹനാപകടത്തിൽ മകൻ മരിച്ചു, പിന്നാലെ ഡോക്ടറായ മാതാവ് കായംകുളത്ത് ജീവനൊടുക്കി

കായംകുളം: മാവേലിക്കര ജില്ലാ ആശുപത്രിയിലെ വനിതാ ഡോക്ടറെ മരിച്ച നിലയിൽ കണ്ടെത്തി. ഡോ. മെഹറുന്നിസയെ (48) ആണ് കായംകുളത്തെ വീട്ടിൽ മരിച്ച നിലയിൽ കണ്ടെത്തിയത്. ഇവരുടെ മകൻ കാനഡയിൽ വാഹനാപകടത്തിൽ മരിച്ചിരുന്നു. ഈ വിവരം അറിഞ്ഞതിന് പിന്നാലെയാണ് മെഹറുന്നിസ ജീവനൊടുക്കിയത്. കായംകുളം പൊലീസ് സ്ഥലത്തെത്തി തുടർ നടപടികൾ സ്വീകരിച്ചു.

അഡ്വക്കേറ്റ് ഷഫീക്ക് റഹ്മാന്റെ ഭാര്യയാണ് മെഹറുന്നീസ. മാവേലിക്കര ജില്ലാ ആശുപത്രിയിൽ ഇഎൻടി വിഭാഗത്തിലാണ് ജോലി ചെയ്തിരുന്നത്. ഇവരുടെ മൂത്ത മകൻ കാനഡയിൽ എഞ്ചിനീയറിംഗ് വിദ്യാർത്ഥിയായ ബിന്യാമിൻ കഴിഞ്ഞ ദിവസമാണ് വാഹനാപകടത്തിൽ മരിച്ചത്. വിവരമറിഞ്ഞത് മുതൽ കടുത്ത മനോവിഷമത്തിലായിരുന്നു മെഹറുന്നീസ. ഇന്ന് രാവിലെ ഏഴരയോടെ ആണ് ഇവരെ മരിച്ച നിലയിൽ കണ്ടെത്തിയത്.

'മകൻ പോയി, ഇനി ജീവിച്ചിരുന്നിട്ട് കാര്യമില്ല' എന്ന് മെഹറുന്നീസ പറഞ്ഞിരുന്നതായി ഇവരുടെ സുഹൃത്ത് പറയുന്നു. ഇളയ മകനും ഭർത്താവും രാവിലെ പള്ളിയിൽ പോയ സമയത്താണ് ഡോക്ടർ ജീവനൊടുക്കിയത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പോസ്റ്റ്‌മോർട്ടം നടപടികൾക്ക് ശേഷം മൃതദേഹം വീട്ടുകാർക്ക് വിട്ടുകൊടുക്കും.