അത്‌ലറ്റിക്കോയെ അടിച്ചിട്ട് ബാഴ്സലോണ

മാഡ്രിഡ് : സ്പാനിഷ് ലാ ലിഗ ഫുട്ബാളിൽ കഴിഞ്ഞരാത്രി നടന്ന വമ്പൻ മത്സരത്തിൽ അത്‌ലറ്റിക്കോ മാഡ്രിഡിനെ ഏകപക്ഷീയമായ ഒരു ഗോളിന് തോൽപ്പിച്ച് ബാഴ്സലോണ മൂന്നാം സ്ഥാനത്തേക്ക് ഉയർന്നു. ബാഴ്സയുടെ തട്ടകത്തിൽ നടന്ന മത്സരത്തിന്റെ 28-ാം മിനിട്ടിൽ യാവോ ഫെലിക്സിന്റെ ഗോളിനായിരുന്നു ബാഴ്സയുടെ ജയം.

ഈ സീസണിലെ 15 മത്സരങ്ങളിൽ ബാഴ്സയുടെ പത്താം ജയമായിരുന്നു ഇത്. 34 പോയിന്റുമായാണ് ബാഴ്സ മൂന്നാമതേക്ക് ഉയർന്നത്. ഈ മത്സരത്തിന് മുമ്പ് 31 പോയിന്റ് വീതമായിരുന്നു ബാഴ്സയ്ക്കും അത്‌ലറ്റിക്കോ മാഡ്രിഡിനും. എന്നാൽ ഗോൾ മാർജിനിൽ അത്‌ലറ്റിക്കോ മൂന്നാം സ്ഥാനത്തായിരുന്നു. കളികഴിഞ്ഞപ്പോൾ മൂന്ന് പോയിന്റ് വ്യത്യാസത്തിൽ ബാഴ്സ മൂന്നാമതെത്തി. അത്‌ലറ്റിക്കോ നാലാമതായി.

15 മത്സരങ്ങളിൽ 38 പോയിന്റുള്ള റയൽ മാഡ്രിഡാണ് ലാ ലിഗയിൽ ഒന്നാം സ്ഥാനത്ത്. 38 പോയിന്റ് തന്നെയുള്ള ജിറോണ ഗോൾ മാർജിനിൽ രണ്ടാം സ്ഥാനത്താണ്.