ഞാനിപ്പോൾ സർവ്വതന്ത്ര

സ്വാതന്ത്ര്യത്തിൻ മാർഗത്തിൽ

ഭാരഭാണ്ഡങ്ങളും

ദാഹമോഹങ്ങളും

ദേഹബന്ധങ്ങളും

ഗേഹ സ്വാസ്ഥ്യങ്ങളും‌

വെടിഞ്ഞു തൂവലിൻ

തൂമഞ്ഞു തുള്ളികൾ

കുടഞ്ഞുകളഞ്ഞു-

മുയർന്നു പറന്നും

പാറിയും കഴിയുന്നു

ജലദ ദലമായി

എനിക്കിന്ന് പരേതാത്മാക്കളാം

ബന്ധുക്കളെ തിരിച്ചറിഞ്ഞിടാം

ഭാഷയേതും മറുപടി പറയാം

സ്വേച്ഛയാൽ ജന്മങ്ങൾ സ്വീകരിച്ചിടാം

ഉൗർജ്ജരൂപ മായതിനാൽ

തീർത്തുമില്ലിനിനാശവും

ജാതിമത വേലികളില്ല

വർണ്ണവർഗ വിവേചനത്തിൻ

പത്രമടിക്കും കൊടികളില്ല

ഭ്രഷ്ടയന്ധാളനുമുൽ-

കൃഷ്ട ബ്രാഹ്മണനുമിന്നു

സത്യസമമൊന്നു തന്നെ

സ്വർഗ നരകങ്ങളില്ല

ലിംഗഭേദങ്ങളില്ല

കറുപ്പും വെളുപ്പുമില്ല

ചുവപ്പും പച്ചപ്പുമില്ല

വെറുപ്പും വിദ്വേഷവുമില്ല

നിറഞ്ഞുള്ള മനസ്സുമാത്രം

തെളിയുമനന്തതയിൽ

തിളങ്ങുമുഡുരശ്മി ഞാൻ.

ഫോൺ: 8089917940.