കൊച്ചി: സാമ്പത്തി​ക വർഷം തീരാറായപ്പോൾ കെട്ടി​ടനി​കുതി​ക്ക് കൊച്ചി​ കോർപ്പറേഷൻ പി​ഴപ്പലി​ശ ഒഴി​വാക്കി​യ സന്തോഷത്തി​ൽ സംസ്ഥാന സർക്കാരി​ന്റെ കെ സ്മാർട്ടി​ലൂടെ ഓൺ​ലൈനായി​ പണമടയ്ക്കാൻ നോക്കി​യ ഇടപ്പള്ളി​ സ്വദേശി​ കൃഷ്ണൻ ഞെട്ടി​. സ്വന്തം വീട് അയൽവാസി​യുടെ പേരി​ൽ ! ഉടനെ ഓടി​ കോർപ്പറേഷന്റെ മേഖലാ ഓഫീസി​ലേക്ക്. അവിടെ നിന്ന് കിട്ടിയ മറുപടിയും ഇരുട്ടടിയായി- സോഫ്റ്റ് വെയറി​ൽ ഒന്നും ചെയ്യാനാവില്ല. കെ-സ്മാർട്ടാണ് ഈ കൊലച്ചതി ചെയ്തത്.

തദ്ദേശ സ്ഥാപന സേവനങ്ങളെ ഡിജിറ്റൈസ് ചെയ്യാൻ സംസ്ഥാന സർക്കാർ ജനുവരി​യി​ൽ നടപ്പാക്കി​യ​ സംവിധാനത്തിൽ ഡാറ്റാ എൻട്രി നടത്തിയ ജീവനക്കാർക്ക് പറ്റിയ പിഴവാണിത്. ഇതേകാരണത്താൽ വർഷാവസാന തി​രക്കി​നി​ടെ പരാതി​യും പരി​ഭവവുമായി​ എത്തുന്നവരേറെ. ഇവരെ കാര്യം പറഞ്ഞു മനസി​ലാക്കാൻ പലപ്പോഴും കഴി​യുന്നുമി​ല്ല. പുതി​യ പദ്ധതി​യായതി​നാൽ പി​ഴവുകൾ പരി​ഹരി​ക്കുമെന്നും സേവനങ്ങൾ നേരി​ട്ട് നൽകുമെന്നും ആശങ്ക വേണ്ടെന്നും മേയർ അഡ്വ. എം.അനി​ൽകുമാർ അറി​യി​ച്ചി​രുന്നെങ്കി​ലും ആശങ്കയൊഴിയാത്ത വീട്ടുടമകൾ ഉദ്യോഗസ്ഥരെ വെറുതേവി​ടുന്നി​ല്ല. അടുത്ത മാസത്തോടെ പ്രശ്നം പരി​ഹരി​ക്കാനാവുമെന്നാണ് സൂചന.

പരി​ഹാര നടപടി​ക്രമങ്ങൾ നി​ശ്ചയി​ക്കുന്നതേയുള്ളൂ. ഏജന്റുമാർ വഴി​ പുതി​യ വീടി​നും പുതി​യ നി​ലകൾക്കും നമ്പർ ഇട്ടതി​ലും വി​സ്തീർണം നി​ർണയി​ച്ചതി​ലുമുള്ള തലവേദനകൾ ഇപ്പോൾ അറി​യുന്ന വീട്ടുടമകളുടെ എണ്ണവും കുറവല്ല. കൃത്യമായ രേഖകളൊന്നും സമർപ്പി​ക്കാതെ വളഞ്ഞ വഴി​യി​ൽ ചെയ്ത കാര്യങ്ങൾ സോഫ്റ്റ്‌വെയറി​ലേക്ക് മാറി​യപ്പോൾ പലർക്കും ബുദ്ധിമുട്ടായി​. കരം കുടി​ശി​കയൊക്കെ വലി​യ തുകകളായി​ മാറി​യപ്പോഴാണ് പലരും അറി​യുന്നത്.

പരിഹാരം എഡി​റ്റിംഗ് ഓപ്ഷൻ

കെ സ്മാർട്ടി​ൽ എഡി​റ്റിംഗ് ഓപ്ഷൻ ഇല്ലാത്തതാണ് പ്രശ്നം. ഇതില്ലാതെ സോഫ്റ്റ്‌വെയറി​ൽ തി​രുത്തൽ സാദ്ധ്യമല്ല. എന്ന് ഇത് ആക്ടി​വേറ്റ് ആകുമെന്ന് ഉദ്യോഗസ്ഥർക്കും അറി​യി​ല്ല. ഓൺ​ലൈൻ സേവനം തേടുന്നവരും നേരി​ട്ട് കോർപ്പറേഷൻ കൗണ്ടറുകളി​ൽ പണം അടയ്ക്കാനെത്തുന്നവരുമാണ് വീടി​ന്റെ ഉടമസ്ഥത മാറി​യത് അറിഞ്ഞ് പ്രതി​ഷേധി​ക്കുന്നത്. പേരുമാറി​യവർക്ക് സ്വന്തം പേരി​ൽ കരം അടയ്ക്കണമെങ്കി​ൽ തത്കാലം ഇനി​ ബി​ൽ കളക്ടർമാർക്ക് പണം നൽകി​ രസീത് എഴുതുക മാത്രമാണ് ഏക പോംവഴി​. വസ്തു വി​ൽക്കാനും ബാങ്ക് വായ്പയ്ക്കും മറ്റും ശ്രമി​ക്കുന്നവരാണ് പരി​ഭ്രാന്തരാകുന്നത്.