തിരുവനന്തപുരം: ഇന്ന് കോട്ടയം,തൃശൂർ ജില്ലകളിൽ താപനില 37 ഡിഗ്രി സെൽഷ്യസ് വരെ ഉയരും. ആലപ്പുഴ, എറണാകുളം, കോഴിക്കോട്, കണ്ണൂർ ജില്ലകളിൽ താപനില 36 വരെയും ഉയരാം. ഈ ജില്ലകളിൽ യെല്ലോ അലർട്ടാണ്. കൊല്ലം, ആലപ്പുഴ, കോട്ടയം, തൃശൂർ ജില്ലകളിൽ സൂര്യാഘാത സാദ്ധ്യതയുണ്ട്.
കാരുണ്യ: 90 കോടി കുടിശിക നൽകണം
കൊച്ചി: സർക്കാരിന്റെ കാരുണ്യപദ്ധതിയിലേക്ക് മരുന്ന് വിതരണം ചെയ്തതിൽ 90.88കോടി രൂപ കിട്ടാനുണ്ടെന്ന സൺ ഫാർമയുടെ പരാതിയിൽ ഇടപെട്ട് ഹൈക്കോടതി. സൺ ഫാർമ പ്രതിനിധികളുമായി ഉടൻ ചർച്ചനടത്തി പരിഹാരത്തിന് സാദ്ധ്യമായ മാർഗങ്ങൾ തേടണമെന്ന് കോടതി മെഡിക്കൽ സർവീസസ് കോർപ്പറേഷന് നിർദ്ദേശം നൽകി. ഹർജി വീണ്ടും പരിഗണിക്കുന്ന 19ന് മെഡിക്കൽ സർവീസസ് കോർപ്പറേഷൻ ഇത് സംബന്ധിച്ച റിപ്പോർട്ട് സമർപ്പിക്കണം. വൻതുക കുടിശികയായിട്ടുണ്ടെങ്കിൽ സാഹചര്യം സർക്കാരും വിശദീകരിക്കണം.
പാഠപുസ്തക
വിതരണം 12 മുതൽ
കോഴിക്കോട്: അടുത്ത അദ്ധ്യയന വർഷത്തെ പാഠപുസ്തകം ഈ മാസം 12ന് വിതരണം ചെയ്യുമെന്ന് വിദ്യാഭ്യാസ മന്ത്രി വി.ശിവൻകുട്ടി പറഞ്ഞു. കോഴിക്കോട് മെഡിക്കൽ കോളേജ് കാമ്പസ് ഗവ. ഹയർ സെക്കൻഡറി സ്കൂളിലെ മൾട്ടിപർപ്പസ് കോംപ്ലക്സ് ഉദ്ഘാടനം ചെയ്യുകയായിരുന്നു മന്ത്രി. തിരുവനന്തപുരത്തെ സ്കൂളിലായിരിക്കും വിതരണോദ്ഘാടനം. 2, 4, 6, 8,10 ക്ലാസുകളിലെ പാഠപുസ്തകമാണ് വിതരണം ചെയ്യുക. 1, 3, 5, 7, 9 ക്ലാസുകളിലെ പുസ്തകം സ്കൂൾ തുറക്കുന്നതിന് മൂന്നാഴ്ചയ്ക്ക് മുമ്പ് എത്തുമെന്നും മന്ത്രി പറഞ്ഞു.
ഇന്ധന സർചാർജ്ജ്:തെളിവെടുപ്പ് 5ന്
തിരുവനന്തപുരം:വൈദ്യുതി ബില്ലിനൊപ്പം ഇന്ധന സർചാർജ്ജ് ഇൗടാക്കാൻ അനുമതി തേടി കെ.എസ്.ഇ.ബി. സമർപ്പിച്ച അപേക്ഷയിൽ സംസ്ഥാന വൈദ്യുതിറെഗുലേറ്ററി കമ്മിഷൻ 5ന് രാവിലെ 11ന് വെള്ളയമ്പലത്തെ കമ്മിഷൻ ആസ്ഥാനത്ത് തെളിവെടുപ്പ് നടത്തും. പൊതുജനങ്ങൾക്കും സംഘടനകൾക്കും സ്ഥാപനങ്ങൾക്കും പങ്കെടുക്കാം.
വീഡിയോ കോൺഫറൻസിലൂടെ പങ്കെടുക്കാൻ താത്പര്യമുള്ളവർ 4ന് ഉച്ചയ്ക്ക് 12 മണിക്ക് മുമ്പ് പേരും വിശദവിവരങ്ങളും ഫോൺ നമ്പർ സഹിതം കമ്മിഷൻ സെക്രട്ടറിയെ ഇ മെയിലിലൂടെ അറിയിക്കണം.അഭിപ്രായം മെയിലിലോ,തപാലിലോ അറിയിക്കാം.തപാൽ വിലാസം:സെക്രട്ടറി, കേരള സംസ്ഥാന വൈദ്യുതി റഗലേറ്ററി കമ്മീഷൻ, കെ.പി.എഫ്.സി ഭവനം, സി.വി. രാമൻപിള്ള റോഡ് വെള്ളയമ്പലം, തിരുവനന്തപുരം 695010.ഇ.മെയിൽ.kserc@erckerala.org.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |