ചേർത്തല: പുരാവസ്തു തട്ടിപ്പുകേസിലെ പ്രതി മോൻസൺ മാവുങ്കലിന്റെ ഭാര്യ ട്രഷറിയിൽ പെൻഷൻ വാങ്ങാൻ ക്യു നിൽക്കവെ കുഴഞ്ഞുവീണുമരിച്ചു. ഇന്നലെ രാവിലെ 11മണിയോടെ ചേർത്തല സബ് ട്രഷറിയിലാണ് നഗരസഭ 26ാം വാർഡ് വല്ലയിൽ മാവുങ്കൽ ത്രേസ്യാമ്മ (മോൻസി-69) കുഴഞ്ഞുവീണത്. റിട്ട.അദ്ധ്യാപികയാണ്. ട്രഷറി ജീവനക്കാർ ഇവരെ ചേർത്തല താലൂക്ക് ആശുപത്രിയിലെത്തിച്ചെങ്കിലും രക്ഷിക്കാനായില്ല. മക്കൾ സ്ഥലത്തില്ലാത്തതിനാൽ വീട്ടിൽ തനിച്ചായിരുന്നു താമസം.
ചേർത്തല മതിലകം ലി​റ്റിൽ ഫ്ളവർ യു.പി സ്‌കൂളിലും വിവാഹ ശേഷം ഇടുക്കി രാജഗിരി ലി​റ്റിൽ ഫ്ളവർ സ്‌കൂളിലും അദ്ധ്യാപികയായിരുന്നു. ചേർത്തല പൊലീസ് ഇൻക്വസ്​റ്റ് തയ്യാറാക്കി. ഹൃദയാഘാതമാണ് മരണകാരണമെന്നാണ് ഡോക്ടർമാരുടെയും നിഗമനം. എന്നാലും പോസ്​റ്റുമോർട്ടത്തിനു നിർദ്ദേശം നൽകിയിട്ടുണ്ട്.

ആലപ്പുഴ മെഡിക്കൽ കോളേജിലെ പോസ്​റ്റുമോർട്ടതിനു ശേഷം ഇന്ന്
ചേർത്തല മുട്ടം സെന്റ് മേരീസ് ഫൊറോനപള്ളി സെമിത്തേരിയിൽ സംസ്‌കരിക്കും.

മക്കൾ: മാനസ് മോൻസൺ (മെഡിക്കൽ വിദ്യാർത്ഥി,കളമശേരി മെഡിക്കൽ കോളേജ്), ഡോ.മിമിഷ മോൻസൺ(ഹോളി ഫാമിലി ഹോസ്പിറ്റൽ,തൊടുപുഴ).

തൃശൂർ വീയ്യൂർ ജയിലിൽ കഴിയുന്ന മോൻസൺ മാവുങ്കലിന് സംസ്‌കാര ചടങ്ങിൽ പങ്കെടുക്കാൻ ജയിൽ അധികൃതർ അനുമതി നൽകി.