 മണിക്കൂറുകൾ കുടുങ്ങി യാത്രക്കാർ

കൊച്ചി: ലൈൻ പൊട്ടിവീണ് വൈദ്യുതി നിലച്ചതോടെ എറണാകുളം- ആലുവ റൂട്ടിൽ ട്രെയിനുകൾ മണിക്കൂറുകൾ വഴിയിലായി. ഇന്നലെ വൈകിട്ട് ആറരയോടെ പെയ്ത കനത്ത മഴയിൽ ഇടപ്പള്ളി സ്റ്റേഷന് സമീപം റെയിൽവേയുടെ വൈദ്യുതിലൈൻ പൊട്ടിവീഴുകയായിരുന്നു.

തിരുവനന്തപുരം - കണ്ണൂർ ജനശതാബ്ദി എക്സ്‌പ്രസ് എറണാകുളം നോർത്ത് സ്റ്റേഷനിൽ നിന്ന് പുറപ്പെട്ടതിന് തൊട്ടുപിന്നാലെയായിരുന്നു സംഭവം. തുടർന്ന് ഇടപ്പള്ളിക്കും എറണാകുളത്തിനുമിടയിലെ പുതുക്കലവട്ടത്ത് നിറുത്തിയിട്ടു. രാത്രി 9.45ന് എറണാകുളം സ്റ്റേഷനിൽനിന്ന് ഡീസൽ എൻജിൻ എത്തിച്ചാണ് യാത്ര പുനരാരംഭിച്ചത്. മൂന്ന് മണിക്കൂറിലേറെ യാത്രക്കാർ വഴിയിൽക്കുടുങ്ങി.

നിലമ്പൂർ - കോട്ടയം പാസഞ്ചർ അങ്കമാലിയിലും കൊച്ചുവേളി- യശ്വന്തപൂർ എക്സ്‌പ്രസ് തൃപ്പൂണിത്തുറയിലും പിടിച്ചിട്ടു. ചെന്നൈ മെയിൽ, നിസാമുദ്ദീൻ സൂപ്പർഫാസ്റ്റ്, കണ്ണൂർ - എറണാകുളം ഇന്റർസിറ്റി എന്നിവയും വിവിധ സ്റ്റേഷനുകളിൽ പിടിച്ചിട്ടു.