കൊച്ചി: ക്ഷേമ മന്ദിരങ്ങളിലെ അന്തേവാസികൾക്ക് ബിരുദ പ്രവേശനത്തിനും സംവരണം ഏർപ്പെടുത്തുമെന്ന് മന്ത്രി ആർ. ബിന്ദു.
മദർ തെരേസയുടെ ജന്മദിനത്തോടനുബന്ധിച്ച് സംസ്ഥാന സാമൂഹ്യക്ഷേമ വകുപ്പും ഓർഫനേജ് കൺട്രോൾ ബോർഡും ചേർന്ന് സംഘടിപ്പിച്ച അഗതി അനാഥ ദിനാചരണത്തിന്റെ സംസ്ഥാനതല ഉദ്ഘാടനം നിർവഹിക്കുകയായിരുന്നു മന്ത്രി. നിലവിൽ പ്ലസ് വൺ, ജനറൽ നഴ്സിംഗ് പ്രവേശനത്തിന് സംവരണമുണ്ട്.
സംസ്ഥാനത്ത് 1813 ക്ഷേമ മന്ദിരങ്ങളിലായി 71,017 താമസക്കാരുണ്ട്. എല്ലാവർക്കും മരുന്നും ആരോഗ്യ പരിരക്ഷയും ലഭ്യമാക്കാൻ ഓർഫനേജ് കൺട്രോൾ ബോർഡിലൂടെ ശ്രമിക്കുന്നുണ്ടെന്നും മന്ത്രി പറഞ്ഞു.
മേയർ എം. അനിൽകുമാർ അദ്ധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് മനോജ് മൂത്തേടൻ, ഓർഫനേജ് കൺട്രോൾ ബോർഡ് ചെയർമാൻ എൻ. അബ്ദുള്ള തുടങ്ങിയവർ പങ്കെടുത്തു.
നഴ്സിംഗ്, പാരാമെഡിക്കൽ അലോട്ട്മെന്റ്
തിരുവനന്തപുരം: നഴ്സിംഗ്, പാരാമെഡിക്കൽ കോഴ്സുകളിൽ രണ്ടാം അലോട്ട്മെന്റ് ലഭിച്ചവർ www.lbscentre.kerala.gov.inൽ നിന്ന് ഫീ പെയ്മെന്റ് സ്ലിപ്പ് ഫെഡറൽ ബാങ്കിന്റെ ഏതെങ്കിലും ശാഖയിൽ ഹാജരാക്കി 29നകം ഫീസടയ്ക്കണം. ഫീസ് അടയ്ക്കാത്തവർക്ക് അലോട്ട്മെന്റ് നഷ്ടപ്പെടും. ഫീസടച്ചവർ കോളേജുകളിൽ അഡ്മിഷൻ എടുക്കേണ്ടതില്ല. വിവരങ്ങൾക്ക്: 04712560363, 64.
എൽ എൽ.എം ഉത്തരസൂചിക
തിരുവനന്തപുരം: എൽ എൽ.എം പ്രവേശന പരീക്ഷയുടെ ഉത്തരസൂചിക www.cee.kerala.gov.in ൽ പ്രസിദ്ധീകരിച്ചു. ആക്ഷേപങ്ങൾ 28വരെ ഉന്നയിക്കാം. വിജ്ഞാപനം വെബ്സൈറ്റിൽ. ഹെൽപ്പ് ലൈൻ- 04712525300
പി.ജി.ഡെന്റൽ മൂന്നാം അലോട്ട്മെന്റ്
തിരുവനന്തപുരം: സർക്കാർ, സ്വാശ്രയ ഡെന്റൽ കോളേജുകളിലെ ബിരുദാനന്തര ബിരുദ കോഴ്സുകളുടെ മൂന്നാംഘട്ട അലോട്ട്മെന്റ് www.cee.kerala.gov.in ൽ പ്രസിദ്ധീകരിച്ചു. അലോട്ട്മെന്റ് ലഭിച്ചവർ കോളേജുകളിൽ 30ന് വൈകിട്ട് 4നകം അലോട്ട്മെന്റ് മെമ്മോയിൽ സൂചിപ്പിച്ചിട്ടുള്ള രേഖകൾ സഹിതം ഹാജരായി പ്രവേശനം നേടണം. വിശദവിവരങ്ങൾക്ക് www.cee.kerala.gov.in.
കെ.എഫ്.സി സ്റ്റാർട്ടപ്പ്
കോൺക്ലേവ് 29ന്
തിരുവനന്തപുരം: കേരള ഫിനാൻഷ്യൽ കോർപ്പറേഷന്റെ സ്റ്റാർട്ടപ്പ് കോൺക്ലേവ് 29ന് രാവിലെ 11.30ന് ഹയാത്ത് റീജൻസിയിൽ ധനമന്ത്രി കെ.എൻ.ബാലഗോപാൽ ഉദ്ഘാടനം ചെയ്യും. മികച്ച സ്റ്റാർട്ടപ്പുകൾക്കുള്ള പുരസ്കാരദാനവും ഈ ധനകാര്യവർഷത്തെ കെ.എഫ്.സിയുടെ വാർഷിക റിപ്പോർട്ടിന്റെ പ്രകാശനവും ചടങ്ങിൽ നിർവഹിക്കും. സർക്കാരിനുള്ള ഈ വർഷത്തെ ലാഭവിഹിതമായ 36കോടി രൂപയുടെ ചെക്കും കൈമാറും. സ്റ്റാർട്ടപ്പ് രംഗത്ത് മികവ് തെളിയിച്ച കമ്പനികളുടെ ഉത്പന്നങ്ങളുടെ പ്രദർശനവുമുണ്ടാകും.
അസാപ് കേരള പ്ലേസ്മെന്റ് ഡ്രൈവ്
തിരുവനന്തപുരം:അസാപ് കേരളയുടെ പ്ലേസ്മെന്റ് ഡ്രൈവ് സെപ്തംബർ 6ന് കൊച്ചി എസ്.സി.എം.എസ് കാമ്പസിൽ നടക്കും.ഇൻഫർമേഷൻ ടെക്നോളജി, സേവന മേഖലകൾ എന്നിവയ്ക്കു പുറമേ ഓട്ടോമോട്ടീവ് സർവീസ് മുതൽ മെഡിക്കൽ കോഡിംഗ് വരെയുള്ള മേഖലകളിലെ 25ഓളം കമ്പനികൾ പങ്കെടുക്കും.രജിസ്ട്രേഷന് https://tinyurl.com/ASAP-Placement-drive . ഫോൺ. 9495999670/9495999617
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |