ബാഡ്മിന്റൺ കോർട്ടുകളിൽ ഇന്ത്യയുടെ ഇടിമുഴക്കമായി മാറിയ പി വി സിന്ധു വിവാഹിതയാകുന്നുവെന്ന വാർത്തകൾ അടുത്തിടെയാണ് പുറത്തുവന്നത്. കുടുംബസുഹൃത്തും പ്രമുഖ സോഫ്റ്റ്വെയർ കമ്പനിയായ പൊസിഡെക്സ് ടെക്നോളജീസിന്റെ എക്സിക്യുട്ടീവ് ഡയറക്ടറും ഹൈദരാബാദ് സ്വദേശിയുമായ വെങ്കടദത്ത സായിയാണ് വരൻ. ഇപ്പോഴിതാ ഇരുവരുടെയും വിവാഹനിശ്ചയ ചിത്രങ്ങളാണ് സോഷ്യൽ മീഡിയയിൽ വെെറലാകുന്നത്.
മിസ്സ് റ്റു മിസിസ്സ് എന്നെഴുതിയ ബോർഡിനരികിൽ വിവാഹമോതിരം കെെമാറുന്ന പിവി സിന്ധുവിനെയും പ്രതിശ്രുത വരൻ വെങ്കടദത്ത സായിയെയും ചിത്രത്തിൽ കാണാം. സിന്ധുതന്നെയാണ് ചിത്രങ്ങൾ തന്റെ ഔദ്യോഗിക പേജിൽ പങ്കുവച്ചത്. ഖലീൽ ജിബ്രാന്റെ കവിതാശകലം അടിക്കുറിപ്പായി നൽകിയിട്ടുമുണ്ട്. 'സ്നേഹം നിങ്ങളെ വിളിക്കുമ്പോൾ അവനെ അനുഗമിക്കുക, കാരണം സ്നേഹം തന്നെയല്ലാതെ മറ്റൊന്നും നൽകുന്നില്ല' - എന്നാണ് കുറിച്ചിരിക്കുന്നത്.
ഡിസംബർ 22-ന് രാജസ്ഥാനിലെ ഉദയ്പുരിലായിരിക്കും വിവാഹം. 20-ാം തീയതി ചടങ്ങുകൾ ആരംഭിക്കും. 24-ന് ഹൈദരാബാദിൽ വിവാഹ സത്കാരം നടക്കും. 29-കാരിയായ സിന്ധു 2016 റിയോ ഒളിമ്പിക്സിൽ വെള്ളിയും 2020 ടോക്യോ ഒളിമ്പിക്സിൽ വെങ്കലവും നേടിയിരുന്നു. ലോകചാമ്പ്യൻഷിപ്പുകളിൽ ഒരു സ്വർണവും രണ്ടുവീതം വെള്ളിയും വെങ്കലവും ഉൾപ്പടെ നിരവധി അന്താരാഷ്ട്ര മെഡലുകൾ നേടിയിട്ടുള്ള സിന്ധു കുറച്ചുകാലമായി അത്ര ഫോമിലായിരുന്നില്ല. കഴിഞ്ഞദിവസം സെയ്ദ് മോദി ടൂർണമെന്റിലെ വനിതാ കിരീടം നേടി ഫോം വീണ്ടെടുത്തിട്ടുണ്ട്. വിവാഹം കഴിഞ്ഞ് ജനുവരിയിൽ മത്സരവേദിയിലേക്ക് എത്താനാണ് സിന്ധുവിന്റെ തീരുമാനം. മുൻ ദേശീയ വോളിബാൾ താരങ്ങളായ പി.വി രമണയുടേയും പി.വിജയയുടേയും മകളാണ് സിന്ധു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |