മലയോരമേഖലയിലെ ടൂറിസം പദ്ധതികൾ കടലാസിലൊതുങ്ങുന്നു

വെള്ളറട: മലയോരമേഖലയിലെ ടൂറിസം പദ്ധതികൾ പ്രഖ്യാപനം മാത്രമാകുന്നു.

മലയോരത്തെ മൂന്ന് ഗ്രാമപഞ്ചായത്തുകളിൽ ടൂറിസം പദ്ധതികൾക്ക് വളരെയേറെ സാദ്ധ്യതകളുണ്ടെന്ന് ടൂറിസം അധികൃതരുടെ പരിശോധനകളിൽ കണ്ടെത്തിയിട്ടുണ്ട്.

വെള്ളറട ഗ്രാമപഞ്ചായത്തിലെ പ്ളാങ്കുടിക്കാവ് ഇക്കോടൂറിസം പദ്ധതി പ്രഖ്യാപിച്ചെങ്കിലും നടപ്പിലായില്ല. കന്യാകുമാരിയും തൃപ്പരപ്പും നെയ്യാർ ഡാമും സന്ദർശിക്കുന്ന ടൂറിസ്റ്റുകൾക്ക് വെള്ളറടയിലെ പ്ളാങ്കുടിക്കാവ് ഇക്കോടൂറിസം പദ്ധതി പ്രദേശത്ത് സൗകര്യങ്ങൾ ഒരുക്കിയാൽ ഇവിടെയും ടൂറിസം വളരും. അമ്പൂരി ഗ്രാമപഞ്ചായത്തിൽ നിരവധി പ്രദേശങ്ങൾ ടൂറിസം സാദ്ധ്യതകൾക്ക് അനുയോജ്യമാണെന്ന് കണ്ടെത്തിയിട്ടുണ്ട്.

അമ്പൂരി

പുറുത്തിപ്പാറയിലെ ദൃവ്യപാറ,ഗുഹാക്ഷേത്രം, നെയ്യാർ റിസർവയറിനോട് ചേർന്നുള്ള മായത്തും ബോട്ട് യാത്ര എന്നിവയെല്ലാമുള്ള കുന്നുകളും മലകളും ദ്വീപുകളും നിറഞ്ഞ ഭൂപ്രദേശമാണ് അമ്പൂരി.

ടൂറിസം സാദ്ധ്യതാപഠനം ഇവിടെ നടന്നിട്ട് കാലങ്ങളായി. ടൂറിസ്റ്റുകളെ ആകർഷിക്കാൻ അമ്പൂരിയുടെ വിവിധ ഭാഗങ്ങളിൽ സ്വകാര്യ റിസോർട്ടുകളും ഭക്ഷണശാലകളും തയ്യാറായിക്കഴിഞ്ഞെങ്കിലും അംഗീകൃത ടൂറിസം പദ്ധതികളൊന്നും നടപ്പിലായില്ല.

തിരിഞ്ഞുനോക്കാത്ത

ടൂറിസം മേഖല

ആര്യങ്കോട് ഗ്രാമപഞ്ചായത്തിലും നിരവധി ടൂറിസം സാദ്ധ്യതയുള്ള പ്രദേശങ്ങളുണ്ട്. കിഴക്കൻമല, പഴിഞ്ഞിപ്പാറ, പൊഴിയല്ലൂർ, കോയിക്കൽ, ഈരാറ്റിൻപുറം, അരുവിക്കര പ്രദേശങ്ങളും ടൂറിസത്തിന് ഏറെ സാദ്ധ്യതയുള്ള പ്രദേശങ്ങളെന്നു കാണിച്ച് ആര്യങ്കോട് ഗ്രാമപഞ്ചായത്തും അധികൃതരെ സമീപിച്ചെങ്കിലും ഇവിടെയും ടൂറിസം പദ്ധതി നടപ്പായില്ല.

സംവിധാനമൊരുക്കിയാൽ

വൻ നേട്ടം കൈവരിക്കാം

ടൂറിസം പദ്ധതികൾ നടപ്പിലാക്കിയാൽ മലയോര മേഖലയിലെ വികസനങ്ങൾ വേഗത്തിലാക്കാനും നിരവധി പേർക്ക് തൊഴിലും വരുമാനവും കണ്ടെത്താനും കഴിയുമായിരുന്നു. വെള്ളറടയിൽ ഏറെ നാളുകൾക്ക് മുമ്പുതന്നെ പഞ്ചായത്തിന്റെയും ടൂറിസം പ്രമോഷണൽ കൗൺസിലിന്റെയും ആഭിമുഖ്യത്തിൽ പ്ളാങ്കുടുക്കാവിൽ ടൂറിസം വാരാഘോഷം സംഘടിപ്പിച്ചിരുന്നു. തുടർപ്രവർത്തനങ്ങൾ കാര്യക്ഷമമല്ലാത്തതുകൊണ്ടാണ് പദ്ധതികൾ നടപ്പിലാകാത്തത്. ടൂറിസ്റ്റുകളെ ആകർഷിക്കാൻ വേണ്ട സംവിധാനങ്ങൾ ഒരുക്കിയാൽ ഈ മേഖലയിൽ സർക്കാരിന് വൻ സാമ്പത്തിക നേട്ടം കൈവരിക്കാനാകും.