കർദിനാൾ റോബർട്ട് പ്രെവോസ്റ്റ് പുതിയ മാർപ്പാപ്പ,​ ആദ്യത്തെ അമേരിക്കൻ പോപ്പ് ,​ ലിയോ പതിന്നാലാമൻ എന്നറിയപ്പെടും

വത്തിക്കാൻ : കർദ്ദിനാൾ റോബർട്ട് പ്രെവോസ്റ്റ് ആഗോള കത്തോലിക്കാ സഭയുടെ പരമാദ്ധ്യക്ഷൻ. മാർപ്പാപ്പയാകുന്ന ആദ്യത്തെ അമേരിക്കനാണ് 69കാരനായ റോബർട്ട് പ്രെവോസ്റ്റ്. ലിയോ 14ാമൻ മാർപ്പാപ്പ എന്നായിരിക്കും അദ്ദേഹം അറിയപ്പെടുക. മാർപ്പാപ്പയെ തിരഞ്ഞെടുക്കാനുള്ള കോൺക്ലേവ് കൂടി രണ്ടാംദിവസമാണ് 267-ാമത്തെ മാർപാപ്പയെ തിരഞ്ഞെടുത്തത്.

സിസ്റ്റിൻ ചാപ്പലിലെ ചിമ്മിനിയിൽ നിന്ന് മൂന്നാംവട്ടം വെളുത്ത പുക ഉയർന്നതോടെയാണ് പുതിയ മാർപാപ്പയെ തിരഞ്ഞെടുത്തതായി സ്ഥിരീകരിച്ചത്. സെന്റ് പീറ്റേഴ്സ് ചത്വരത്തിൽ 45,000ത്തിലധികം പേരാണു പുതിയ മാർപാപ്പയെ തിരഞ്ഞെടുത്തുവെന്ന വാർത്ത കേൾക്കാനായി എത്തിയത്. ആദ്യ ഫലം പ്രാദേശിക സമയം രാവിലെ 10.30നും രണ്ടാമത്തേത് 12നു ശേഷവും മൂന്നാമത്തേത് വൈകിട്ട് 5.30നും നാലാമത്തേത് രാത്രി 7നും വ്യക്തമാകുമെന്നാണു വത്തിക്കാൻ അറിയിച്ചിരുന്നത്. ആദ്യ രണ്ട് റൗണ്ടുകളിൽ ചിമ്മിനിയിൽ നിന്ന് കറുത്ത പുകയാണ് ഉയർന്നത്. വോട്ടവകാശമുള്ള 133 കർദിനാൾമാരും കോൺക്ലേവിൽ പങ്കെടുക്കുന്നുണ്ട്. അതിനാൽ മൂന്നിൽ രണ്ടു ഭൂരിപക്ഷത്തിന് ഒരാൾക്ക് 89 വോട്ട് വേണ്ടിവരും. വോട്ടവകാശമുള്ളവരും ഇല്ലാത്തവരുമായ കർദിനാൾമാർ ഇന്നലെ രാവിലെ ഇന്ത്യൻ സമയം 10ന് സെന്റ് പീറ്റേഴ്സ് ബസിലിക്കയിൽ ബലിയർപ്പിച്ചു.