കാട്ടുതീ: കനേഡിയൻ പ്രവിശ്യയിൽ അടിയന്തരാവസ്ഥ

ഒട്ടാവ: പടിഞ്ഞാറൻ കാനഡയിലെ സസ്‌കാറ്റ്‌ചെവാൻ പ്രവിശ്യയിൽ കാട്ടുതീയുടെ പശ്ചാത്തലത്തിൽ അടിയന്തരാവസ്ഥ പ്രഖ്യാപിച്ചു. ഇവിടെ 14 ഇടങ്ങളിൽ കാട്ടുതീ വ്യാപിക്കുന്ന സാഹചര്യത്തിലാണ് തീരുമാനം. സമീപ പ്രവിശ്യയായ മാനിറ്റോബയിൽ 17,000 പേരെ ഒഴിപ്പിക്കാൻ അധികൃതർ നിർദ്ദേശം നൽകിയതിന് പിന്നാലെയാണിത്. സസ്‌കാറ്റ്‌ചെവാനിൽ 4,000 പേരെ ഈ ആഴ്ച ആദ്യം ഒഴിപ്പിച്ചിരുന്നു. കാനഡയിൽ 163 ഇടങ്ങളിൽ നിലവിൽ കാട്ടുതീ സജീവമായി തുടരുന്നുണ്ട്. ഇതിൽ പകുതിയും നിയന്ത്രണാതീതമാണ്. കാട്ടുതീയുടെ ഫലമായുള്ള ശക്തമായ പുക കാനഡയുടെ തെക്കൻ അതിർത്തി കടന്ന് യു.എസിലേക്ക് എത്തിത്തുടങ്ങി.