പങ്കാളിയെ ഭയം, യുവാവ് അസ്ഥികളുമായി എത്തിയത് മദ്യലഹരിയിൽ; നവജാതശിശുക്കളെ ദമ്പതികൾ കുഴിച്ചിട്ടതിൽ ദുരൂഹത

തൃശൂർ: പുതുക്കാട് അവിവാഹിതരായ ദമ്പതികൾ നവജാതശിശുക്കളെ കുഴിച്ചുമൂടിയ സംഭവത്തിൽ കൂടുതൽ വിവരങ്ങൾ പുറത്ത്. വെളളിക്കുളങ്ങര സ്വദേശികളായ 26കാരനെയും 21കാരിയെയുമാണ് ഇപ്പോൾ കസ്​റ്റഡിയിൽ എടുത്തിരിക്കുന്നത്. യുവാവാണ് കുഞ്ഞുങ്ങളുടെ അസ്ഥികളുമായി സ്‌​റ്റേഷനിലെത്തിയത്. ഇരുവർക്കും ജനിച്ച ആദ്യ കുഞ്ഞിന്റെ അസ്ഥികൾ യുവതി, യുവാവിനെ ഏൽപ്പിക്കുകയായിരുന്നു. അധികം വൈകാതെ തന്നെ യുവതി വീണ്ടും ഗർഭിണിയായി. ആ കുഞ്ഞും മരിച്ചെന്നാണ് യുവതി യുവാവിനോട് പറഞ്ഞിരുന്നത്.

രണ്ടാമത്തെ കുഞ്ഞിന്റെയും അസ്ഥി കഷ്ണങ്ങൾ കർമം ചെയ്യുന്നതിനായി യുവാവിനെ ഏൽപ്പിക്കുകയായിരുന്നു. തുടർന്നാണ് യുവാവിന് ചില സംശയങ്ങൾ തോന്നിയത്. യുവതി തന്നെയും അപായപ്പെടുത്തുമോയെന്ന ഭയം കൊണ്ടാണ് കുഞ്ഞുങ്ങളുടെ അസ്ഥി കഷ്ണങ്ങളുമായി യുവാവ് പൊലീസ് സ്​റ്റേഷനിലെത്തിയത്. അതേസമയം, യുവാവ് കൊണ്ടുവന്നത് അസ്ഥി കഷ്ണങ്ങൾ തന്നെയാണോയെന്ന കാര്യത്തിൽ ശാസ്ത്രീയ പരിശോധനകൾക്ക് വിധേയമാക്കാനുണ്ടെന്നാണ് പൊലീസ് നൽകുന്ന വിവരം.

യുവതിയുടെ ബന്ധുക്കളെ വിളിച്ചുവരുത്തി ചോദ്യം ചെയ്യാനാണ് പൊലീസ് ഒരുങ്ങുന്നത്. ഈ സംഭവത്തിൽ തൃശൂർ റൂറൽ എസ്‌പി കൃഷ്ണകുമാർ ബി മാദ്ധ്യമങ്ങളോട് പ്രതികരിച്ചു. ഇന്നലെ രാത്രി 12 മണിയോടെ മദ്യലഹരിയിലാണ് യുവാവ് സ്‌​റ്റേഷനിലെത്തിയത്. രണ്ട് കുഞ്ഞുങ്ങളെയും രണ്ട് സ്ഥലങ്ങളിലായാണ് കുഴിച്ചിട്ടതെന്നുമാണ് യുവാവ് പറഞ്ഞത്.