കാസർകോട്ട് അദ്ധ്യാപികയെ പൂട്ടിയിട്ടു, കണ്ണൂരിൽ അദ്ധ്യാപകരുടെ കാറുകളുടെ കാറ്റഴിച്ചുവിട്ടു; സ്‌കൂളുകളിലും സംഘർഷം

കണ്ണൂർ: പണിമുടക്കുമായി ബന്ധപ്പെട്ട് കണ്ണൂർ ശ്രീകണ്‌ഠപുരം നഗരസഭയിലെ നെടുങ്ങോം ജിഎച്ച്‌എസ്‌എസിൽ സംഘർഷം. ജോലിക്കെത്തിയ അദ്ധ്യാപകരുടെ വാഹനങ്ങളുടെ ടയറിന്റെ കാറ്റ് സമരാനുകൂലികൾ അഴിച്ചുവിട്ടു. കെപിഎസ്‌ടിഎ, എച്ച്‌എസ്‌ടിഎ യൂണിയനുകളിൽപ്പെട്ട 15 അദ്ധ്യാപകരാണ് ഹാജരായത്.

പുറത്ത് നിന്നെത്തിയ സമരാനുകൂലികൾ സ്‌കൂളിൽ കയറി ബഹളമുണ്ടാക്കി. ഇതിനിടെയാണ് കാർ ഉൾപ്പെടെ ഏഴ് വാഹനങ്ങളുടെ കാറ്റ് അഴിച്ചുവിട്ടത്. സംഘർഷത്തെ തുടർന്ന് പൊലീസ് സ്ഥലത്തെത്തി. അദ്ധ്യാപകർ ഇപ്പോഴും സ്‌കൂളിൽ തന്നെ തുടരുകയാണ്. കുട്ടികൾ ഇല്ലാത്തതിനാൽ ക്ലാസ് നടക്കുന്നില്ല.

അതേസമയം, കാസർകോട് വെള്ളരിക്കുണ്ട് പരപ്പ ഗവൺമെന്റ് ഹയർ സെക്കൻഡറി സ്‌കൂളിൽ അദ്ധ്യാപികയെ സമരാനുകൂലികൾ പൂട്ടിയിട്ടു. രാവിലെ പത്ത് മണിയോടെ സംഘടിച്ചെത്തിയ ഇടത് നേതാക്കളാണ് അദ്ധ്യാപിക സിജിയെ ഓഫീസിൽ പൂട്ടിയിട്ടത്. പ്രധാന അദ്ധ്യാപികയുടെ ചുമതല വഹിക്കുന്ന അദ്ധ്യാപിക പ്രഭാവതിയുമായി സമരാനുകൂലികൾ വാക്കേറ്റം നടത്തി. പൊലീസ് എത്തിയാണ് വാതിൽ തുറന്നത്. സംഭവത്തിൽ പൊലീസിൽ പരാതി നൽകുമെന്ന് അദ്ധ്യാപിക പറഞ്ഞു.