കെ.എസ്.ആർ.ടി.സി ബസിന് കല്ലെറിഞ്ഞു,​ മാദ്ധ്യമ പ്രവർത്തകന് നേരെ കൈയേറ്റ ശ്രമം

മൂവാറ്റുപുഴ: ദേശീയ പണിമുടക്കിന്റെ ഭാഗമായി മൂവാറ്റുപുഴയിൽ പണിമുടക്ക് അനുകൂലികൾ വ്യാപക ആക്രമണം അഴിച്ചുവിട്ടതായി പരാതി . കെ.എസ്.ആർ.ടി.സി ബസിന്റെ ചില്ല് കല്ലെറിഞ്ഞു തകർക്കുകയും ഇതിന്റെ ദൃശ്യങ്ങൾ പകർത്താൻ ശ്രമിച്ച മാദ്ധ്യമ പ്രവർത്തകന് നേരെ കൈയേറ്റം നടത്തുകയും ചെയ്തു. കോഴിക്കോട് നിന്ന് പാലായ്ക്ക് സർവീസ് നടത്തിയ കെ.എസ്.ആർ.ടി.സി ബസിന് നേരെയാണ് വെള്ളൂർക്കുന്നത്ത് പണിമുടക്ക് അനുകൂലികൾ കല്ലെറിഞ്ഞത്. ചില്ല് തെറിച്ച് കണ്ടക്ടർക്ക് പരിക്കേറ്റു. ഈ ദൃശ്യങ്ങൾ പകർത്തുന്നതിനിടയിലാണ് മാദ്ധ്യമ പ്രവർത്തകൻ അനൂപിന് നേരെ കൈയേറ്റമുണ്ടായത്. അനൂപ് മൂവാറ്റുപുഴയിലെ സ്വകാര്യ ആശുപത്രിയിൽ ചികിത്സയിലാണ്.

പകുതിയോളം യാത്രക്കാർ ഉണ്ടായിരുന്ന ബസ് പിന്നീട് പോലീസ് സ്റ്റേഷനിലേക്ക് മാറ്റി. സംഭവത്തിൽ മുടവൂർ മറ്റത്തിൽ രാജഗോപാൽ (57),​ പുളിഞ്ചോട് ഷുക്കൂർ എന്നിവരെ കസ്റ്റഡിയിലെടുത്തു.