കാനഡയിൽ പരിശീലന പറക്കലിനിടെ വിമാനങ്ങൾ കൂട്ടിയിടിച്ചു; മലയാളി വിദ്യാർത്ഥിയടക്കം രണ്ട് പേർ മരിച്ചു

ഒട്ടാവ: കാനഡയിൽ പരിശീലന പറക്കലിനിടെ വിമാനങ്ങൾ കൂട്ടിയിടിച്ച് മലയാളി വിദ്യാർത്ഥിയടക്കം രണ്ട് പേർ മരിച്ചു. തൃപ്പൂണിത്തുറ സ്വദേശി ശ്രീഹരി സുകേഷും സഹപാഠി സാവന്ന മേയ് റോയ്സുമാണ് മരിച്ചത്. കാനഡയിലെ ഹാർവ്സ് എയർ പൈലറ്റ് ട്രെയിനിംഗ് സ്‌കൂളിലെ വിദ്യാർത്ഥികളായിരുന്നു ഇരുവരും.

സ്വകാര്യ പൈലറ്റ് ലൈസൻസ് നേടിയ ശ്രീഹരി കൊമേഴ്ഷ്യൽ ലൈസൻസിനുള്ള പരിശീലനത്തിലായിരുന്നു. കാനഡയിലെ മാനിട്ടോബയിലാണ് അപകടമുണ്ടായത്. 'വിദ്യാർത്ഥികൾ ഒറ്റ എഞ്ചിൻ വിമാനം പറത്തുകയായിരുന്നു. ഇരുവരുടെയും വിമാനങ്ങൾ കൂട്ടിയിടിക്കുകയായിരുന്നു. വിമാനത്തിൽ യാത്രക്കാരുണ്ടായിരുന്നില്ല'- പൊലീസ് പറഞ്ഞു.

ഇരുവരും സംഭവസ്ഥലത്ത് വച്ചുതന്നെ മരിച്ചു. ചൊവ്വാഴ്ചയാണ് അപകടമുണ്ടായതെങ്കിലും മരിച്ചവരുടെ പേരുവിവരങ്ങൾ ഇപ്പോഴാണ് പുറത്തുവിട്ടത്. ആശയ വിനിമയത്തകരാറാണ് അപകടത്തിന് കാരണമെന്നാണ് സൂചന. മൃതദേഹം എത്രയും വേഗം നാട്ടിലെത്തിക്കണമെന്നും ഇക്കാര്യത്തിൽ സർക്കാർ ഇടപെടൽ വേണമെന്നും ശ്രീഹരി സുകേഷിന്റെ കുടുംബം ആവശ്യപ്പെട്ടു.