കേരളത്തിൽ അധികം വൈകാതെ കാർമേഘം ഇരുണ്ടുമൂടും; കാരണം ചൈനയിലും വിയറ്റ്‌നാമിലും ഉണ്ടായ വിഫ

തിരുവനന്തപുരം: കേരളത്തിൽ വരും ദിവസങ്ങളിൽ കനത്ത മഴയ്‌ക്ക് സാദ്ധ്യത. ചൈന, വിയറ്റ്‌നാം എന്നീ രാജ്യങ്ങളിലുണ്ടായ ശക്തമായ വിഫ ചുഴലിക്കാറ്റിന്റെ പ്രതിഫലനമാണ് സംസ്ഥാനത്തെ മഴയ്‌ക്ക് കാരണം. തെക്കൻ ചൈനയിലുൾപ്പെടെ വീശിയടിച്ച വിഫയുടെ സ്വാധീനത്തിൽ വെള്ളിയാഴ്‌ച മുതൽ അതിശക്തമായ മഴയുണ്ടാകുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്.

അതിതീവ്ര ചുഴലിക്കാറ്റായ വിഫ ചക്രവാതച്ചുഴിയായി ബംഗാൾ ഉൾക്കടലിൽ പ്രവേശിക്കും. ഇതിന്റെ സ്വാധീനത്തിൽ ന്യൂനമർദം രൂപപ്പെടാനുള്ള സാദ്ധ്യതയുണ്ടെന്നാണ് നിഗമനം. കേരളത്തിൽ വരും ദിവസങ്ങളിൽ ശക്തവും അതിശക്തവുമായ മഴയ്‌ക്ക് സാദ്ധ്യതയെന്നാണ് പ്രവചനം. ജൂലായ് 26വരെ വിവിധ ജില്ലകളിൽ കേന്ദ്ര കാലാവസ്ഥാ വകുപ്പ് ഓറഞ്ച്, യെല്ലോ അലർട്ട് പ്രഖ്യാപിച്ചിട്ടുണ്ട്.

വെള്ളിയാഴ്‌ച പത്തനംതിട്ട, കോട്ടയം, ഇടുക്കി, എറണാകുളം, തൃശൂർ ജില്ലകളിലും ശനിയാഴ്‌ച പാലക്കാട്, മലപ്പുറം, കോഴിക്കോട്, വയനാട് ജില്ലകളിലും ഓറഞ്ച് അലർട്ടാണ്. ഇന്ന് പത്തനംതിട്ട, ആലപ്പുഴ, കോട്ടയം, ഇടുക്കി, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ യെല്ലോ അലർട്ടാണ്. നാളെ പത്തനംതിട്ട, കോട്ടയം, ഇടുക്കി, കോഴിക്കോട്, വയനാട്, കണ്ണൂർ, കാസർകോട് ജില്ലകളിലും വെള്ളിയാഴ്‌ച തിരുവനന്തപുരം, കൊല്ലം, ആലപ്പുഴ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലും യെല്ലോ അലർട്ട് പ്രഖ്യാപിച്ചിട്ടുണ്ട്.