മൺസൂൺ ബമ്പർ: 10 കോടി കണ്ണൂരിൽ

തിരുവനന്തപുരം/കണ്ണൂർ: മൺസൂൺ ബമ്പർ ലോട്ടറിയുടെ 10 കോടി രൂപ ഒന്നാം സമ്മാനം കണ്ണൂരിൽ വിറ്റ എം.സി 678572 നമ്പർ ടിക്കറ്റിന്. തളിപ്പറമ്പ് കുറുമാത്തൂർ പൊക്കുണ്ടിലെ എ.കെ.ജി ലോട്ടറി സ്‌റ്റാൾ നടത്തിപ്പുകാരൻ ഗംഗാധരൻ വിറ്റ ടിക്കറ്റാണിത്. തളിപ്പറമ്പിലെ രാജീവന്റെ തമ്പുരാൻ ലോട്ടറി ഓഫീസിൽ നിന്ന് മൂന്നു ദിവസം മുമ്പെടുത്ത 4 ബുക്കിൽ നിന്നും വില്പന നടത്തിയ ടിക്കറ്റിനാണ് സമ്മാനം. ഭാഗ്യവാനെ കണ്ടെത്താനായിട്ടില്ല.

രണ്ടാം സമ്മാനം 10 ലക്ഷം വീതം അഞ്ചു പരമ്പരകൾക്കും മൂന്നാം സമ്മാനം അഞ്ചു ലക്ഷം വീതം അഞ്ചു പരമ്പരകൾക്കും നാലാം സമ്മാനം മൂന്നു ലക്ഷം വീതം അഞ്ചു പരമ്പരകൾക്കും ലഭിക്കും. ഇന്നലെ ഗോർഖിഭവനിലായിരുന്നു നറുക്കെടുപ്പ്. വില്പനയ്ക്കെത്തിച്ച 34 ലക്ഷം ടിക്കറ്റുകളിൽ 33,48,990 ടിക്കറ്റുകളും വിറ്റുപോയിരുന്നു. 250 രൂപയായിരുന്നു ടിക്കറ്റു വില. ഒാണം ബമ്പർ ലോട്ടറി ഉടൻ വിപണിയിലെത്തും.