ഉറക്കമുണർന്നയുടൻ കൈ ഭൂമിയിൽ തൊട്ട് ശിരസിൽ വയ്‌ക്കുന്നത് എന്തിനെന്ന് അറിയുമോ?

ഭാരതീയ വിശ്വാസപ്രകാരം ഓരോ കാര്യങ്ങൾ ചെയ്യുന്നതിന് മുൻപും പഴമക്കാർ ചില ആരാധനകളും പ്രാർത്ഥനകളും നടത്തിയിരുന്നു. പുതിയകാലത്ത് നല്ലൊരുപങ്ക് മലയാളികളും ഇത്തരം കാര്യങ്ങൾ മറന്നുപോകുകയോ അറിയാത്തതിനാൽ ഉപേക്ഷിക്കുകയോ ചെയ്‌തിട്ടുണ്ട്. അത്തരത്തിലൊന്നാണ് പുലർ‌ച്ചെ ഉറക്കമുണർന്നയുടനെ നിലം തൊട്ട് തലയിൽ വയ്‌ക്കുന്ന പതിവ്.

പോസിറ്റീവ് ജീവിതത്തിനായി വലതുവശം തിരിഞ്ഞ് വേണം കിടക്കയിൽ നിന്നും എഴുന്നേൽക്കാൻ എന്ന് ആചാര്യന്മാർ നിഷ്‌കർഷിക്കുന്നു. എഴുന്നേറ്റയുടൻ ഇരുകൈകളും ചേർത്ത് വിദ്യാ ദേവതയെയും ലക്ഷ്‌മീ ദേവിയെയും സരസ്വതീ ദേവിയെയും സ്‌തുതിച്ച് പ്രാർത്ഥിക്കുക പതിവുണ്ട്. അതിനുശേഷം ചെയ്യുന്നതാണ് ഭൂമിയിൽ ചവിട്ടും മുൻപ് കൈകൊണ്ട് ഭൂമിയിൽ തൊട്ട് തലയിൽ വക്കുന്ന രീതി. ഇതൊരു ക്ഷമാപണമാണ് ചെയ്യുന്നത്. ഭൂമീ മാതാവിനോടാണ് ക്ഷമാപണം നടത്തുന്നത്.

'സമുദ്രവസനേ ദേവീ പർവ്വതസ്തന മണ്ഡലേ
വിഷ്ണുപത്നീ നമസ്തുഭ്യം പാദസ്പർശം ക്ഷമസ്വമേ'

എന്ന മന്ത്രമാണ് ഈ സമയം ചൊല്ലേണ്ടത് എന്ന് ആചാര്യന്മാർ നിഷ്‌കർഷിക്കുന്നു. ശാസ്‌ത്രീയമായും ഇതിന് അടിത്തറ കൽപ്പിക്കാറുണ്ട് പഴയകാലത്തെ ജനങ്ങൾ. അത് ഇങ്ങനെയാണ്. കിടന്നുറങ്ങുമ്പോൾ നമുക്ക് ശരീരത്തിലുള്ളത് സ്റ്റാറ്റിക് എനർജിയാണ്. ഇത് കൈനറ്റിക് എനർജിയാകുകയാണ് ഉണരുമ്പോൾ. ഭൂമിയിൽ സ്‌പർശിച്ച് സ്റ്റ‌ാറ്റിക് എനർജിയെ ഒഴിവാക്കി നല്ല ഊർജത്തോടെ ദിനം തുടങ്ങാൻ കൈ കുത്തുന്നു. ഇതോടെ നല്ല ഊർജം ശരീരത്തിലെത്താനും ദിനം നന്നായി മുന്നേറാനും കഴിയുമെന്നാണ് ആചാര്യന്മാർ പറയുന്നത്.