കൃഷിയിടത്തിൽ തേങ്ങ പെറുക്കുന്നതിനിടെ ഷോക്കേറ്റു; തൃശൂരിൽ വീട്ടമ്മയ്‌ക്ക് ദാരുണാന്ത്യം

തൃശൂർ: കൃഷിയിടത്തിൽ പൊട്ടിവീണ വൈദ്യുതി കമ്പിയിൽ നിന്ന് ഷോക്കേറ്റ് സ്‌ത്രീക്ക് ദാരുണാന്ത്യം. എരുമപ്പെട്ടിയിൽ ഇന്ന് രാവിലെ ഒമ്പത് മണിക്കായിരുന്നു അപകടമുണ്ടായത്. കുണ്ടന്നൂർ തെക്കേക്കര മാളിയേക്കൽ വീട്ടിൽ ബെന്നിയുടെ ഭാര്യ ജൂലി (48) ആണ് മരിച്ചത്. ഒപ്പമുണ്ടായിരുന്ന ബെന്നിക്കും ഷോക്കേറ്റു.

വീടിനോട് ചേർന്നുള്ള കൃഷിയിടത്തിൽ തേങ്ങ പെറുക്കാനായി പോയപ്പോഴായിരുന്നു അപകടം. പറമ്പിലെ മോട്ടോർ പുരയിലേക്ക് പോയിരുന്ന വൈദ്യുതി ലൈൻ പൊട്ടിവീണ് അതിൽ നിന്നാണ് ജൂലിക്ക് ഷോക്കേറ്റത്. ഒപ്പമുണ്ടായിരുന്ന ബെന്നി അത്ഭുതകരമായാണ് രക്ഷപ്പെട്ടത്. പരിക്കേറ്റ ജൂലിയെ ഉടൻ തന്നെ തൃശൂർ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.