കോട്ടയത്ത് വൻ കവർച്ച; വൃദ്ധയും മകളും താമസിക്കുന്ന വീട്ടിൽനിന്ന് നഷ്ടമായത് 50 പവനും പണവും

കോട്ടയം: വൃദ്ധയും മകളും മാത്രം താമസിക്കുന്ന വീട്ടിൽ വൻ കവർച്ച. കഞ്ഞിക്കുഴി മാങ്ങാനത്ത് വില്ലയിൽ നിന്നാണ് 50 പവനും പണവും കവർന്നത്. അമ്പുങ്കയത്ത് വീട്ടിൽ അന്നമ്മ തോമസ് (84), മകൾ സ്‌നേഹ ഫിലിപ്പ് (54) എന്നിവരാണ് ഇവിടെ താമസിക്കുന്നത്. സ്‌നേഹയുടെ ഭർത്താവ് വിദേശത്താണ്. ഇവർ ആശുപത്രിയിൽ പോയ സമയത്തായിരുന്നു മോഷണം. വീടിന്റെ വാതിൽ തകർത്താണ് മോഷ്ടാക്കൾ അകത്തുകടന്നത്.

കുറച്ചുനാളുകളായി ശാരീരിക ബുദ്ധിമുട്ട് അനുഭവിക്കുന്ന ആളാണ് അന്നമ്മ തോമസ്. ഇന്നലെ രാത്രി ഇവർക്ക് ദേഹാസ്വാസ്ഥ്യം ഉണ്ടാവുകയും തുടർന്ന് ആംബുലൻസ് വിളിച്ച് മാങ്ങാനത്തെ ആശുപത്രിയിൽ കൊണ്ടുപോവുകയും ചെയ്തു. ഇന്നുപുലർച്ചെ ആറുമണിയോടെ വീട്ടിൽ തിരിച്ചെത്തിയപ്പോഴാണ് മോഷണ വിവരം അറിഞ്ഞത്. മുൻ വാതിൽ തകർത്ത് അകത്തു കടന്ന മോഷ്ടാവ് മുറിയിലെ സ്​റ്റീൽ അലമാരയിൽ സൂക്ഷിച്ചിരുന്ന സ്വർണവും പണവുമാണ് കവർന്നത്.

ഇന്നലെ രാത്രി രണ്ട് മണിക്കും പുലർച്ചെ ആറു മണിക്കും ഇടയിലാണ് മോഷണം നടന്നതെന്നാണ് നിഗമനം. കോട്ടയം ഈസ്​റ്റ് പൊലീസ് സ്റ്റേ​ഷനിൽ നിന്നുള്ള പൊലീസ് സംഘം സ്ഥലത്ത് പരിശോധന നടത്തിയെങ്കിലും പ്രതിയെ സംബന്ധിച്ച് സൂചന ലഭിച്ചിട്ടില്ല എന്നാണ് റിപ്പോർട്ട്. വീടുമായി അടുത്തുബന്ധമുള്ളവരാണ് മോഷണത്തിന് പിന്നിലെന്നാണ് പൊലീസ് കരുതുന്നത്. താമസക്കാർ ആശുപത്രിയിൽ പോയതുൾപ്പെടെ വ്യക്തമായി മനസിലാക്കിയശേഷമായിരുന്നു മോഷണം എന്നാണ് കരുതുന്നത് .